早前，關智斌（Kenny）舉行他首個巡迴演唱會《關智斌時光機巡迴音樂會》，日前於北京舉行最後一站圓滿結束。由於是最後一站，Kenny決定為歌迷送上驚喜，除以「限定金毛look」現身外，歌單更是精心挑選，由跳唱的《LALA世界》、《一起喝采》到抒情的《眼紅館》、《日月》等，一次過滿足晒全場觀眾。
近半年都在進行巡唱的Kenny，完成中山、佛山、上海、廣州、成都及北京的演出後，Kenny表示完成這六站巡唱，對他是一個很大的學習過程，他坦言自己甚少製作演唱會經驗，因此在這次籌備過程中遇上不少挑戰，例如編排歌曲、音樂製作、以及找適合的樂隊等，「因為成個演唱會唔係淨係唱幾隻歌，成個演唱會要好流暢、要有起承轉合、要有主題，中間點樣同觀眾互動等等，呢啲反而係我喺《披荊斬棘的哥哥》呢個節目入面學到返嚟，學到點樣帶動觀眾情緒，完全沉醉喺個氛圍入面。我目標好明確，我淨係想我每一首歌都帶到一個意思，可以令到觀眾離開時候都會回味。」
至於難忘事，Kenny坦言每一場都很難忘，例如上海站，期間Kenny因工作關係需要飛到瑞士出席活動，活動完後便要即時飛回上海，「Jet lag都未完全回復過嚟嘅時候，已經要去表演，都擔心自己精神狀態唔好。」不過最大挑戰則是「天氣不似預期」，連Kenny也表示要認命，「我每一次開show嗰個地方都會落雨，我未去之前係陽光普照天氣好好，但到我一開show就會傾盆大雨，第二日又好天返，所以呢一樣嘢我幾深刻，深刻係因為我都好擔心令到粉絲好辛苦、好奔波、好操勞。」特別是廣州站，開show那天大暴雨加龍捲風，fans在場外準備的種種應援物都要收起，Kenny說：「有好多人因為要趕車、趕飛機，好多延誤，令到佢哋失咗好多預算，甚至乎有陣時淋雨淋到成身濕晒，呢個我幾心痛，因為我知道佢哋好多都係女仔，嚟到都唔容易，希望我下次去開show嘅場館，出面會有多啲地方，可以俾觀眾避雨啦！」
