98年度港姐季軍吳文忻 （現改名吳忻熹 Nathaliie），早前於《明周》公開乳癌復發第三期，並擴散至淋巴腺後，積極面對治療。
剛踏入50歲的阿Nat，接受三次化療後，決定接受新治療方法，八月已赴泰國進行「免疫細胞治療」，本周有第一次報告，左胸腫瘤縮小了一半，阿Nat對報告感到amazing；積極對抗病魔的阿Nat，因身體的痛症開始減輕，本周二(5日)到幕前舊拍檔李煒尚(原名為李尚文)的瑜伽中心上堂，希望再減低身體內的炎症。
自公開病情後，各界好友紛紛送上祝福，阿Nat亦收到很多新進治療方法，集合各方面意見和做足資料搜集，阿Nat八月到曼谷嘗試一種治療癌症的新方法，叫做免疫細胞治療Cell Therapy，當時阿Nat解釋︰「點解會有呢個決定呢？其實自從報道出街之後，好感恩，好多認識和唔認識嘅朋友都send咗好多治療方法俾我去參考，我亦都一一上網做過research，咁啱亦有朋友做過呢個細胞治療而又成功咗，我都睇咗好多clinical report啦，做個research又網上study過之後，覺得呢個細胞治療會好適合我，所以就選擇咗去做。」
阿Nat八月初開始接受免疫細胞治療，回輸自體免疫細胞，並於10月31日做PET Scan(Positron Emission Tomography「正電子掃描」)，本周終於有第一次報告，阿Nat說︰「因為政府都要排期，化療三次就停咗，轉做免疫細胞治療，其實前後個半月左右，出來效果係個腫瘤細咗一半，對比返四月嘅時候，當時個腫瘤最長5.9cm，依家由5.2cm X 2.1cm X 5.9cm （4月報告）轉到2.8 x 2.6 x 2.0cm（10月31日報告）。」
阿Nat補充︰「PET scan除咗見到腫瘤細咗之外，其實仲有好多detail位，但都幾複雜，例如頸、腰背L5個位都係有著燈嘅，咁同四月個報告係一樣，但係嗰個就verify唔到係咪cancer，因為要抽biopsy(活體組織檢查)先知，其實發炎、炎症照PET scan嘅時候都會著燈，唯一證實係當時抽過biopsy嘅位，左胸同埋淋巴嗰度，咁依家都見到，但個胸個cancer係縮小咗一半以上，淋巴嗰度都有著燈，其實教授都話正常，因為你入面嘅免疫細胞打緊仗，嗰個位發炎都係正常，所以回輸咗入去身體，大概個半月都冇，有呢個效果都係好amazing！」
「咁但係呢，今次骨嗰度其實都有(著燈)，佢都有講係suspicious(可疑的)，有可能啲cancer轉移咗去骨，呢個四月嘅報告都有講到，亦都有機會骨嗰度都係炎症，因為其實我之前都有骨痛，尤其是髖關節位，之後做完化療之後亦更加周身骨痛，但係依家身體狀況呢，我嗰啲骨痛都逐漸減少，之前一路都好想做運動，但一路都做唔到，因為我連行路都覺得有啲痛，依家就恢復返好多。」
體力開始恢復，阿Nat亦開始做運動，更加注重飲食，「唔好食咁多糖啦，最好就戒糖，因為糖分會令到身體發炎，同埋做多啲yoga，因為炎症都係卡住咗喺身體裏面，yoga可以做伸展，將啲炎症帶走，唔好卡住晒喺身體度，依家就即刻pick up返做運動。」
本周二，阿Nat就見返一位多年冇見的幕前好友李煒尚，兩人以前曾經合作拍戲，原來對方現時已是星級瑜伽教練，連任達華都是他的學生。阿Nat說︰「David識咗好耐，拍完戲之後就冇聯絡，cancer報道出街之後，原來佢有個朋友喺十年前都患上乳癌，同埋轉移咗去淋巴，都冇做傳統治療，都係搵教授就醫，David就想介紹俾我識，就係咁樣我哋就『相認』返，亦開始喺佢個studio做yoga，希望將身體炎症快啲消除，其實瑜伽唔單止幫我身體裏面嘅結解開，其實會幫心靈上都解結，所以對治療係非常之有幫助。」
已很久沒有面對鏡頭的David，亦為阿Nat送上祝福，他說︰「去接受我哋人生會有好多唔同嘅高低，如果可以沉住道氣，平心靜氣繼續行每一步就OK。」
‧嘉賓言論純屬個人意見 並不代表本刊立場
