陳奕迅前晚（13日）於澳門展開其9場的《FEAR AND DREAMS 世界巡迴演唱會-澳門站》，觀眾反應熱烈。不過talk位期間就發生小插曲，被觀眾命令式叫他講國語，令他今日變成熱搜人物，不過大部份觀眾及網友都是支持他講廣東話，認為澳門開演唱會講粵語是平常不過的事，不必為沒禮貌的觀眾不開心。
在演唱會Talk位時，Eason本來很開心問觀眾，「你地係來自澳門？有幾多人來自澳門」全場即歡呼，他向台下道謝 : 「好多謝大家。成晚咁靜，你地都不停嗌咩，下次留番依家先嗌，係靜位就留俾大家…. 你嗌到把聲沙晒我都戥你痛。」由於觀眾太熱情，舞台上Eason多次想講整個演唱會想帶出的意義都被觀眾亂叫打斷，於是他放棄再講，苦笑道：「我知你哋特別熱情，但係我個騷，每隻歌都係一個連貫性舞台劇咁，我唔會俾你哋影響到我，我要好集中去用歌講故仔。其他人都唔好俾呢啲聲音、俾人影響到，我知㗎，其實就係大家沉醉係一個夢裡面，但突然聽到鬧鐘聲，又或者你阿媽叫你起身大叫咁….」然後他又被觀眾狂叫打斷，無奈話，「你再熱情我都係咁上下，其實我聽唔得到你哋叫緊咩，我所有熱情都留咗係唱歌到，依家係演唱會，唔係傾計會，我唔可以同你一個人講嘢，而唔理全場其他觀眾….我耳仔好敏感，我同你講緊嘢，其他聲又來，我聽唔到，我會好煩…..」此時有一位觀眾以命令式口吻大叫：「講國語！」又有人叫：「講普通話！」Eason先以泰文打招呼作回應，然後說：「我想講什麼語文就講什麼！我可以講國語，可以很流利！你可以要求，你可以『唔該』，『請』，『麻煩你』 ，大家唔好誤會，就算今日有人咁樣叫我講英文，我都一樣會叫佢 shut up ！你聽唔明咪算囉 ！」全場觀眾即拍掌歡呼，「 我唔知你哋鼓咩掌，如果David Bowie 係到唱，你會唔會叫佢講國語！講講廣東話呀！奇怪！我都係塞返耳塞算。」
對於今次 Eason不肯被命令講國語，觀眾網民即時討論紛紛，最後更成為熱搜， 百份之九十九的觀眾都支持他講廣東話，更有歌迷留言叫他進內地開唱都全部用廣東話、唱廣東歌，因為這是他們喜愛eason的原因，澳門網民則留言: 「我哋澳門不嬲講粵語！聽唔明不要來」又有觀眾認為咁冇禮貌，搞到 eason唔開心，指那位沒禮貌的人認真羞家！更有一些博主，長篇大論我國56個民族，是一個多語言，多方言國家，你不能以語言文字，對人道德綁架，陳奕迅祖藉東莞，是一位粵語歌手，在粵廣澳開演唱會講廣東話，實屬正常。
而Eason自己則沒有時間去理會網民的討論，因為他還有八場演出要全神貫注，反而更關注自己的睡床，「我住喺咪碧咸設計間房，第一晚訓得麻麻，因為張床係我史上訓過最硬，我一路訓，一路諗，碧咸咁特別設計，咁硬應該有原因，佢係一個運動員，可能訓咁硬可以第日腰骨唔會咁攰，但係我訓得好差… 第二日我拉開張床睇下，下面原來係塊木板。。。一問之下先知原來係上次李克勤要求訓一張硬床，酒店問過我，有咩需求，我又講左句:冇特別， 張床唔好咁軟就得…..佢地以為我同克勤都係有咁需要。結果比張塊硬板我，哈哈。噚晚換番張正常床褥比我，我即刻訓得好好，可以再充滿能量繼續做騷！」
