JPEX案火燒娛樂圈，截至本周三（27日）共15人被捕，除林作、陳怡外，莊思敏、張智霖亦到警局協助調查。上周本刊報道陳怡當網紅前，曾任職壹傳媒旗下刊物做娛記，近日再有讀者向本刊爆料指，陳怡辭職記者後，原來曾轉戰美容圈，先後任職於彩豐行與華洋坊兩個美容集團，不過都不歡而散。
敗走美容圈後，陳怡16年轉型自媒體發展，開設YouTube頻道，到了18年秘交大陸富貴男友，自此作風性情大變，最終走上炒幣之路。
虛擬貨幣平台JPEX自本月13日，遭香港證監會點名未持有牌照，疑似推廣手法涉及詐騙後，牽連甚廣，連娛圈中人亦被波及。上周一（18日）早上，警方商業罪案調查科拘捕林作等8人，其中兩名女士包括36歲網紅陳怡（本名陳穎怡），以及31歲加密貨幣OTC店擁有人陳凱怡，據知陳凱怡為陳怡的胞妹，而陳怡在尖沙咀永安廣場開設的OTC店「陳大怡加密貨幣找換店」，則由其胞妹陳凱怡任持牌人。
保釋後的陳怡隨即在網上出片，講述「我在拘留所的一天，保釋金100萬」，上周五更在網上群組出文指「我聽日去日本玩喇！！律師已經通知咗警方，佢哋話完全冇問題，大家有咩景點推介？」似未受拘捕一事影響。不過在本周三的直播中，陳怡以「我好快俾人斬，潑鏹水」為題出片，片中提及預計自己過一段時間，當冇人留意JPEX新聞之後，就會俾人追殺同毁容，更稱已向屋企人和工人講好，如有事發生要點安排，又指將計劃開記者會。
與同事上司都鬧翻
本刊上周報道陳怡在12至13年間，曾於壹傳媒旗下的娛樂周刊《FACE》當娛記，不夠兩年就離職。近日有讀者向本刊爆料，指陳怡冇做娛記後，曾短暫時間去了一間小型公司做marketing，直屬兩位老外上司，不過在職不久即與上司鬧翻走人，之後開始轉戰美容界，到了陳庭欣男友、彩豐行老闆楊振源（Benny）的美容集團任職市場部員工，同樣不夠一年，再與公司不歡而散。知情人士透露：「陳怡冇做彩豐行之後，佢好快搵到另一份工，去咗另一個美容集團華洋坊做，呢間公司嘅老闆就係亞姐黎淑賢個美容醫生老公Angus（許智政）。當時陳怡見工嘅職位係marketing manager，不過佢下面冇下屬，自己一腳踢做埋，當時佢叫啲同事叫佢做穎怡。」
再次歷史重演，陳怡在華洋坊一年多時間，又與公司鬧翻，知情人士再透露：「佢好有自己主意，唔係好聽人講，同上司、同事都唔係好夾得嚟，有時大家意見唔同，佢就會同人嘈起上嚟，所以佢喺公司冇乜朋友。不過其實陳怡份人，如果佢當你係朋友，佢的確係幾有義氣嘅人！」本刊致電黎淑賢，她就指沒有印象在公司有「陳怡」這個人，「佢做員工定咩？做客人我就唔知，員工一定冇啦，我諗我開咗十幾年都無見過呢個人。」
經歷兩次在美容圈子都敗走收場，陳怡索性做自媒體靠自己，16年開設自家YouTube頻道，初創時期的陳怡走文青路線，拍片講講在法國留學的日子，並未有任何惹火出位言論。據知，到了18年，陳怡交上了一個大陸男友，知情者說：「佢個男友幾有米，好似喺大陸做金融，陳怡識咗佢之後，成個人性情大變，好多同佢friend開嘅朋友，喺嗰段期間都反咗面！」據了解，陳怡成長於單親家庭，父母很早就已離異，由母親獨力湊大她兩姊妹，「佢阿媽離咗婚之後，自己搞生意賺到錢，所以佢兩姊妹成長環境唔錯，佢阿媽仲送佢去法國讀書。陳怡依家住緊喺元朗過千尺低密度住宅，都係佢阿媽買，陳怡由細到大都同佢阿媽感情好好。」
