關楚耀Kelvin最近在無綫新劇《一舞傾城》飾演富二代「Marco」，再受觀眾注目；同時又宣布與拍拖六年的女友Joann拉埋天窗，四十歲的Kelvin終於成家立室，將於明年擺酒。
入行16年，Kelvin直言經歷過高低，現時踏入人生和事業的新階段，但09年日本被捕事件，母親因而患上情緒病，Kelvin直言現在什麼都以家人為先，最緊要媽咪開心。
近年Kelvin專注在劇集發展，新劇播出後反應不錯，他的角色亦很突出，其實接拍《一舞傾城》前，Kevlin有次玩越野單車發生嚴重意外，差點連角色都失去，「一直都有玩，有次落山撞一撞，整個人打了個筋斗落地，其實唔知點樣撞法，起返身時，膊頭整條骨已經係彈起了，入醫院照Ｘ光，發現移了位和骨裂，馬上要全身麻醉做手術，醫生話希望利用腳的韌帶，去綁返實個肩膀，總之都幾傷。」術後有女朋友日夜照顧，康復進度奇蹟地快，Kelvin如期入劇組，亦因為這次意外，令Kelvin認定了「老婆」身份，「所有起居飲食，就連沖涼換衫都要照顧，老婆有自己生意，那段時間她把工作在早上完成，下午便來照顧我，是很感動的，更加令我希望快點成家立室，找到對的人便不要浪費時間了。」
結果，今年二月Kelvin決定向女友求婚，「都籌備了兩、三個月，有一班朋友幫手，去到泰國通常搵餐廳都是她搞，我好少食飯『打卡』，她找了一間都幾靚的餐廳，咁我就問佢，要唔要著靚啲呀？她說要穿西裝，成個trip終於搵到機會，咁就索性這晚搞啦，無理由求婚時候穿短褲拖鞋啩。」他說食飯時盡量拖慢，一班朋友就代他在酒店房佈置和準備，「原本諗住五點半開始食，結果佢化妝換衫六點幾先出門口，心諗死喇，夠唔夠時間呢？其實都好緊張，食完飯仲未收到message話搞掂，結果要埋單喇！收到『OK』，其實都唔知係咪已經搞掂，結果一推開房門，我自己都呆一呆，我真係冇諗過係整到咁靚，講真，我成世仔都未試過做一樣咁浪漫嘅事。」
Kelvin說「老婆」已經沒有做空姐幾年，雖然報道一直稱她為「空姐女友」，但他們都懶得更正，「她是一個都幾低調的女仔，我們都拍拖六年，都甚少post照片，我們相處很簡單，我記得第一次約會，我約她到廟街食大排檔，係咪睇唔出呢？佢又ok喎，之後就成日傾電話，佢令我好似回到以前學生年代咁，煲電話粥喎！」
Kelvin直言自己不是一位浪漫的男朋友，去年情人節，Joann在IG曬出兩疊一千蚊紙，當時便有指Kelvin送上20萬作為情人節禮物，成為網上熱話，Kelvin解釋：「真係要講一次這件事，其實當時是大家夾錢去做生意，只係咁啱在情人節期間，傳下傳下就變成真咁，當時亦沒有特別去解釋，我到現在都是一個不喜歡解釋的人。她沒有做空姐後，很快便找到自己的方向，現在做健康、瘦身產品生意，在這三、四年間看到她成長不少，因為她做網店嘛，非常非常貼地，又識點去宣傳，這方面反而我學到很多東西，我本身亦有經營服裝品牌，她都給了很多意見。」
雖然婚期未定，但Kelvin說完成新劇宣傳，便要馬上着手籌備，「婚禮希望在明年初舉辦，其實要開始訂㗎喇，尋晚先至同老婆講，死啦，嚟緊點呀？酒席、簽字真係要諗㗎喇喎！再唔定酒店可能冇位，唔想拖到夏天，其實都幾頭痛，睇我樣都知道，咩都老婆話事啦！交晒俾佢搞，我只有一個要求，最緊要媽咪開心。」
Kelvin是06年樂壇新人，同期有陳柏宇、周柏豪和洪卓立，大家都仍活躍幕前，Kelvin的發展算是比上不足、比下有餘，他仍跟柏宇保持聯絡，「我們已經不再是在飯局見面，多數是在BB的百日宴見到，其實Jason是我的目標，我們同期出道，看着他堅持做音樂，不停出歌，講真自己都好羨慕，替他很開心，他令我沒有放棄音樂，我仍會繼續出歌的。」
Kelvin上次出席樂壇頒獎禮，已經是17年，之後他簽約邵氏，拍過《特技人》、《星空下的仁醫》、《法證先鋒V》和《一舞傾城》，「我覺得這個是好角色，其實我很想多謝樂小姐(樂易玲)，拍完《特技人》之後，有次同樂小姐傾偈，我話好鍾意入劇組的感覺，其實什麼角色都想試，有份參與就得，我在演員方面經驗始終不多，記得無耐就接了《星空下的仁醫》，做周家怡老公，個角色係好似出十集，但係我有八集瞓喺張牀無乜對白，哈哈！但OK呀，我覺得好踏實，慢慢一步一步行囉！」
入行十六年，Kelvin經歷不少，12年曾推出自傳《關難》講述他19年在日本拘留期間的經歷、成長歲月中的掙扎與痛苦。
其實，那次事件令他最痛苦，是母親因而患上情緒病，「現在好多了，最近妹妹又生了BB，我又有喜事，所以媽咪近期都ok，脾氣減少，佢話好開心個仔終於搵到真命天子，又終於定落嚟，其實，現在做什麼都以家人為先㗎喇，爸爸之前又做了一個手術，腰間盆椎嗰啲，現在出入都要用拐杖，到了他們這個年紀，想多些帶他們去旅行，有機會多些一家人去玩。」Kelvin說現在是人生的新階段，亦希望把過去不好的經歷，以正面方式分享，「會去學校和很多團體分享，對自己都是好事，因為以前可能積埋積埋，在分享會可以講晒出來，給自己一個機會去發洩情緒，咁現在有老婆，好似多了一個人生伴侶，雙打一定好過單打，她幫我減輕不少。」問Kelvin結婚有沒有通知以前的女友？他說：「我諗好多人都知道了，唔使特別講，好多我以前女朋友都冇講。」
場地：省略號 Ellipsis Resto Shisha Lounge