雨僑同羅力威結婚2年，去年升呢做父母，B囡取名Harper。Harper話咁快已經一歲大，兩公婆除咗帶囡囡去拍造型照之外，又為囡囡準備生日Party。雨僑仲大爆唔熱衷慶祝任何生日、紀念日嘅羅力威，竟然為咗Harper嘅生日Party而買西裝褸。
雨僑羅力威
噚日係Harper嘅一歲生日，雨僑喺IG upload同囡囡嘅合照，相中見到Party場地同蛋糕都好靚，睇嚟呢對父母真係落足心機準備。雨僑留言指從來唔熱衷慶祝任何生日、紀念日嘅羅力威竟然為咗囡囡Harper努力，噚日緊張到笑容僵硬面油都出埋，又爆羅力威朝早9點起身之後一個人出咗去買衫，買咗幾件西裝褸。
雨僑羅力威
當雨僑好奇邊到咁早有衫買嘅時候，羅力威就講笑話自己好似人哋屯馬線開通咁「一開閘就衝入去」 ，但因為噚日太熱，最尾都冇著到嗰件西裝褸。雨僑又稱雖然Harper冇乜頭髮走唔到公主路線，但都覺得囡囡噚日好靚女，仲讚囡囡好俾面咁著咗一陣鞋仔。
圖片來源： 雨僑、羅力威＠Instagram
