日前，英皇娛樂集團營運總裁霍汶希（Mani）及旗下藝人衛詩雅（Michelle）受邀，為勵進教育中心舉辦的《青心直說》任嘉賓，出席「香港的影藝事業」分享會。
兩人在分享會中，透過經理人及藝人角度，談及演藝事業在Gen Z一代中如何自處及發展，Mani從教女開始，她坦言現代的年輕人都有自己想法，不能直接幫他們選擇，「你其實係引導佢，但我心目中有自己想法，我哋要用自己方法，引導佢揀我想揀嘅嘢！」她又大爆經常受到女兒挑戰，「我有陣時講嘢，佢會話『媽咪呀，你有冇印證過㗎 ？』哈哈，佢不嬲都挑戰我㗎 ！太多挑戰我嘅例子啦！唉，講講吓我啲火又嚟咗！譬如有一個人送一份禮物俾佢，佢真係即刻上網就check到，呢個係咩型號、幾多錢？唉，真係激死！」
時代不停在變，要跟上時代步伐，就要不停學習，「內地市場實在太大，平台又多，每個平台都有唔同屬性，譬如你想問抖音攞資源，你要答得出抖音資源個名叫『抖加』，你連講『抖加』都唔識，人哋就會『識唔識㗎你！』你要推廣你嘅藝人、項目，都要知道人哋呢個平台要啲乜嘢，所以你要不斷去學習！」Mani一直不斷學習，她憶述多年前由經理人部門被調到宣傳部，「嗰陣我唔係啱啱入行，我已經做咗幾年經理人，而且都幾成功，做經理人時通常係啲人求我，因為嗰陣時我揸住啲紅嘅藝人；有一日，突然間轉咗做宣傳，日日硬着頭皮去電台，冇人識我，面懵懵，自己走埋去派卡片，好唔要面嗰啲呢，由人哋求我變咗我去求人，咁你做唔做吖？我做呀，因為我要留喺呢間公司。」
Michelle則表示自己入行的年代跟現在分別很大，以往自媒體未太盛行，當時需要很多身旁的人幫助，要跟記者打好關係，現在卻是一個全新的生態，最重要是創造機會，「我好想有啲自己嘅嘢俾人知道，我咪自己寫份稿擺上網囉，甚至依家有AI幫你寫，依家冇一個理由係我唔成功，太方便啦！我入行嗰個年代太靠人，要成功要行好多好多步，依家唔係，只要你自己肯努力。」
問到如何勉勵年輕族群別輕易放棄，Michelle分享自身經歷，身為「娛圈牌王」的她，其中一個資格是救生員拯溺章，她自言是一個容易放棄的人，考拯溺章時拍了一條短片，「我對自己講，『衛詩雅，我知你兩個月後，一定喊晒同媽咪講都係唔游啦，唔考呢個牌啦！但你記住，你一定唔可以放棄！你一定得㗎 ！』兩個月後，我真係喊晒同阿媽講我唔游！成班全部都係男仔，得我一個女仔，我游到最尾，跟住我阿媽話『你話自己唔放棄㗎，你話拍咗條片，你自己睇返啦！』我睇返條片，我個眼神好堅定，我都唔知哪來嘅勇氣覺得自己會考到！就係因為咁，我由全班最尾嘅一個女仔，畢業嘅時候我係游第一。我唔知咁樣係咪一定得，但我覺得呢個係一個幾好嘅方法！」