由張振朗、龔嘉欣、劉穎鏇、阮浩棕、吳子冲、蔚雨芯、李成昌、江欣燕、謝雪心等主演的無綫新劇《靈戲逼人》，大膽起用不少新面孔，首周有兩名新生代女演員彈出，分別是飾演若琳的阮嘉敏（Mandy），及飾演中學生阿麗的劉芷玲（Sabrina）。
憑《東張西望》入屋的Mandy，今年先後有份演出《隱形戰隊》及《法言人》。是次Mandy再獻突破，飾演「鵪鶉妹」若琳，並會與阿傑（吳子冲飾）發展戀情。前晚（6日）二人靈探場口，Mandy完全演活表現出少女情懷，她感激監製Simon設計四眼妹造型，並表示為了營造樸素感，劇組花了不少心思：「監製導演想我怕醜啲，所以叫我化淡眼妝，又試咗好多副眼鏡。」Mandy的真實性格，剛好與角色相反，她說：「本身我個人比較健談、開朗同主動，如果我鍾意個男仔，應該會想主動同佢傾計，唔會咁怕醜。」
22歲的Sabrina在劇中飾演中學生，獲網民讚「超Baby Face」零違和感，原來她是2021年藝訓班學員，劇中飾演熱愛粵劇的小妹妹，更疑似是柳芳（龔嘉欣飾）尋找的雲哥（張振朗分飾）孫女，角色甚為關鍵，也有不少發揮機會。昨晚，阿麗的揈水袖場口便每個動作均有板有眼，就連曾為1990年代當紅粵劇花旦的謝雪心，也大讚Sabrina叻女：「長水袖係唔容易耍㗎，我都讚佢叻呀！」Sabrina則透露拍攝前有上堂練習：「之前有一日由朝練到晚都喺度練基本功同水袖動作，到真正拍嗰日就有現場指導。但因為嗰個水袖真係太長，我失敗咗好多次先做到佢哋想要嘅效果。」她自言沒有粵劇根底，相關經驗只是跳舞及唱流行曲，所以開拍前壓力甚大：「都係一路拍一路學一路做。」
另外，心姐昨晚有一幕50秒的「耍雙劍」戲亦相當搶fo，造手與面部表情也讓人看得出神，名副其實寶刀未老。心姐透露其實是抵達現場後才「有乜耍乜」，並感恩自小獲師傅栽培，練好功底：「當年一開始練功就每日刀槍劍都要練，有時櫻槍、雙刀、大刀，即係舞旦刀，呢個（場口）係雙劍，係另一種耍法。嗰時我哋練，就會今日練雙劍、聽日練舞旦刀，櫻槍就每日都打，因為要同人對打，雙劍就自己一個人耍。可能我底功練得耐啦，所以好好彩喺現場一拎起雙劍啲底功就返嚟喇，所以有付出努力練習過嘅嘢總唔會白費。」心姐談到與昌哥在劇中經常鬥嘴，笑言是「奇妙緣分」： 「真係好得意，之前我拍《巾幗3》成日跟住佢個角色，同呢套劇完全相反，絕對過足戲癮。」
