莫文蔚（Karen），永遠都喜歡挑戰自己。
二O一九年，Karen在海拔三千六百四十六公尺「世界之巔」西藏拉薩舉行演唱會，打入了健力士世界紀錄大全；上月毫無預警下，宣布全新巡唱《大秀一場》攻進可容納十萬人的北京國家體育場，Karen再次締造歷史，上周六（15日）成為首位在「鳥巢」舉行個唱的華人女歌手。
今次破例再舉行巡唱，Karen直言只會精選場地和場次，因為這個「大秀」的台燈聲件件都大製作，四十米的LED燈、三十米的伸展舞台，要戶外體育場館才能容納；至於香港站？Karen當然想，劍指明年正式落成可容納五萬人的啟德體育園！
國家體育場是北京市的標誌性建築，因外觀如樹枝編織而成固稱為「鳥巢」，曾為二OO八年北京奧運會、二O二二年北京冬奧會的開閉幕舉辦場地，亦舉辦過多項世界級及國家級文化體育盛事。至於舉辦演唱會，開館十六年來，能夠舉行個人演唱會的都是男歌手，包括王力宏、陳奕迅、林俊傑與李榮浩等；一直有指G.E.M.鄧紫棋和蔡依林也曾極力爭取在「鳥巢」開唱，結果由Karen莫文蔚搶先締造女歌手首登「鳥巢」的開唱紀錄。
Karen曾經說過，不再舉辦大型巡唱，今次肯破例，她坦言也是因為「鳥巢」，「咁多年跑了很多tour，上一次《絕色》tour，其實講過告一段落，當然我冇話要退休，只覺得以後唔需要不停跑tour，所以冇乜大planning！點解會有促成今次《大秀一場》呢？因為去年整個內地演唱會市場非常火熱，因為疫情之後嘛，好多人問過我『喂喂，爭你咋喎』，我話，我唔跑tour，當時亦都決定咗，之後有一日，我哋主辦單位就話『Karen，你真係唔做show喇？我哋攞到鳥巢喎！』我聽到嗰刻，係俾唔到反應，隔咗一陣，可以做鳥巢？梗係要say yes啦！」
守承諾限量巡唱
其實Karen在二O一一年也曾踏上過「鳥巢」舞台，當時為《滾石30周年群星演唱會》，演出歌手多達八十位，Karen回憶起來：「嗰時都冇諗過自己可以一個人開鳥巢，當然係自己多年來其中一個目標，我相信好多歌手都係，但要上到呢個舞台，都要去到某一個位置，有一定成績先得，但我真係冇刻意有呢個planning。當呢個機會出現，我相信就要去把握，之後講講吓先發現，嘩！原來係第一個pop artist女歌手開solo concert，好震撼呀成件事；跟住就積極籌備，既然花咁多時間和心機去設計一個show，無理由淨係做一場啦，不過真係唔會好似以前嗰種密集式concert tour！今次老公有冇投訴？少少啦，佢真係太好，都明白我一定要完成呢個scene，我都冇好離譜，唔會話反正都做，不如繼續好似以前咁跑返tour啦，我冇，我會keep住我嘅promise，所以今次巡唱係限量㗎！」
今次演唱會主題《大秀一場》，Karen解說︰「鳥巢呢個場，激發咗我好多諗法，其實我哋每個人嘅人生，都係自己嘅一場大show。《大秀一場》concept就係咁出嚟，戲如人生，今次個騷以一齣電影概念，最經典一種story telling設計，只有三部分，唔再係七、八part唔同嘅嘢，唱幾首歌落台換套衫再上台。我有啲嘢想呈現，例如我一直好想同管弦樂團合作，因為我大部分歌都係抒情慢歌，特別適合用orchestral方式去重新演繹。」
演唱會一開場，Karen與四十人的管弦樂團一口氣演繹《廣島之戀》、《他不愛我》、《盛夏的果實》、《愛情》、《慢慢喜歡你》、《愛》和《陰天》等經典，一開場已經是全場大合唱，Karen說：「上一次《絕色》show完咗之後，覺得自己career完成咗上半場，亦都中場休息咗；依家呢個show就係下半場開始，第一part特別想做一個回顧又好，算係summary自己上半場，所以要提醒觀眾，如果下一站去到上海嘅時候，一定要準時入場，如果唔係就會miss咗好多歌！」
唯一可能啟德新場館
問Karen可會把《大秀一場》搬到香港？她說︰「因為今次由鳥巢開始，所以成件事個scale都係呢個標準，包括整個design layout、四十米LED燈、三十米伸展舞台……呢個配套，如果要target其他城市，都要搵到一個可以容納到咁大scale嘅場地，一定係足球場呢個venue，如果要帶返香港，又擺唔到入紅館，我諗唯一有可能性就係啟德新場館，依家都未落成，所以睇吓明年得唔得囉，乜都未confirm㗎！」巨型舞台展現出Karen的中西文化藝術，3D畫面及多變的伸展舞台機關，現場非常震撼，而這次服裝髮型化妝也是星級陣容，包括與Karen由入行合作至今的髮型師Carr Cheng、化妝師梁梓晉（Omix）和形象總監吳吉倫（Alvin Goh）。今次Karen的演唱會造型，當晚迅即登上所有網上平台的熱搜。
Karen一向對古箏情有獨鍾，今次演唱會中，她把古箏結合搖滾樂首唱新歌《未濟》，之後組合The Masters出場，Karen由高空降下舞台，以全女班dancers陣容以詠春配合舞蹈演繹《Diva》，有功夫底子的Karen大展身手，「呢part係自家動漫『莫貓寶貝』其中一個環節，呢個角色係莫文蔚化身，係講super hero拯救地球，梗係要從天而降。演唱會當然要跳舞，但我今次只會跳一part，當然就要跳一part勁嘅，舞蹈crossover詠春，十六個女仔加埋我十七個，帶出women power信息，亦因為詠春創自源於女性。」
大秀後的大騷
這次「大秀」，Karen亦宣布與音樂人陳明道（Terry Chan）、荒井十一和李銖銜（James）組成限定樂隊「The Masters」重新出道，「今次又完成我另一個好想做嘅嘢，就係搞個rock band出嚟！Terry和荒井合作無間啦，亦好想介紹一位近期新合作嘅美籍韓裔歌手James，好好玩，希望大家看到不一樣的莫文蔚。」講到搖滾，Karen特別請來搖滾之父伍佰擔任神秘嘉賓，她說：「因為Uncle Five（伍佰）真係大師中嘅大師，係King of Rock，我同佢廿幾年前已經合作，無論在錄音室又好、舞台上又好，我哋太有默契，我好enjoy每次同佢合作，通常請嘉賓都係唱一首半首歌，我同佢propose咗三首歌，點知佢話，唱晒三首啦！」Karen和伍佰合唱了《夏夜晚風》、《Last Dance》和《堅強的理由》，全場high爆！
完騷後，Karen為演唱會團隊在五星級酒店設下豪華慶功宴，與每一位舉杯暢飲和合照，這時候Karen才鬆了一口氣！原來開騷前幾天，北京出現強降雨異常天氣，氣象台更罕見發出高溫黃色預警、暴雨黃色預警、大霧黃色預警、強對流天氣藍色四個預警，Karen的綵排也需要停工，「好驚險呀，今次真係排除萬難，要駕馭鳥巢呢個地方，要好大意志力和念力！唔係講笑，我哋入台之後嗰個禮拜，其實一路天氣都好好，但係呢幾晚氣溫突然急升，幾小時內又會突然烏雲行雷閃電好大雨，雖然來得快走得快，但始終有閃電落雨就有一定危險性，所以一定要停工，的確好影響到進度，但係the show must go on，團隊上下都出心出力，天氣一轉好，我哋就搶返啲時間。其實去到正式rehearsal先剛剛搭好晒個台，時間好緊迫，到開騷真係天公造美，天晴之餘，溫度亦稍微降返啲，好perfect。」
完成「鳥巢」創舉，《大秀一場》之後，Karen另一個新挑戰，是否她多年來的夢想，從零開始打造一套原創華語歌舞劇？Karen表示：「歌舞劇係另一個超級大project，同埋去到另一個領域！先做好呢個『大秀』先，跟住就到下一個『大騷』啦！」
莫文蔚《大秀一場》鳥巢演唱會圖輯︰
