魏浚笙（Jeffrey）、吳浣儀、駱應鈞日前為「昂坪360」拍攝全新一輯廣告，三人飾演家人四圍遊覽，雖然眾人第一次合作，但無礙他們大晒溫馨時刻。Jeffrey不時落足咀頭氹兩位前輩，仲不時叫對方做「阿爸阿媽」，「我細細個都睇佢哋啲戲，最鍾意睇浣儀姐做《我和殭屍有個約會》，真係睇到好熟！之前拍《百萬同居計劃》我同浣儀姐都有份，但係冇機會同場演出，呢日把握機會同兩位請教吓啲演技。」
而浣儀姐就大讚Jeffery演技好，笑言怕被對方趕上，都要進修一下演技，「之前未有機會欣賞佢嘅演技，呢日發現佢做戲非常之好，可以話係收放自如，只要比佢不停講嘢就可以，唔做綜藝真係浪費咗佢嘅天份。佢講嘢真係冇得彈，唔可以唔比佢講嘢。」
至於近年甚少在電視亮相的駱應鈞，就表示與吳浣儀相識數十年，但從來都未做過對手戲，「香港地方好細，大家都會識大家，所以一埋位就可以拍，唔使特別交流嘅！」問到早前身體不適要做手術，駱應鈞就表示：「其實呢排我一直都留喺香港，仲偶爾有拍電影，只係之前做訪問講起做手術，搞到大家誤會以為我有咩唔舒服，其實係好多年前嘅事喇，依家希望疫情冇晒大家多啲工開。」