黃依汶（Emme）與陳國坤於2014年結婚，婚後誕下兒子陳真，一家三口生活幸福美滿。最近她接受HOY TV主播俞詠文的專訪，詳談近況。
由藝人轉型成為飲食揸弗人，Emme表示已經習慣這個新身份：「因為喺做餐飲業之前，已經有自己品牌，唔係由娛樂圈直接跳入呢個崗位，中間都做咗好多唔同嘅職業，當然仲有就係做一個全職媽媽啦！比較起上嚟，做媽咪真係好辛苦，因為我做乜嘢都可以放低，但係小朋友唔可以放低，所以嗰種辛苦係精神上嘅辛苦，即係嗰一刻做嘢已經好攰，但係仲要同個仔傾偈，你係唔可以唔睬佢㗎嘛。」
Emme曾表示與老公的幕前演出，都要給陳真過目及批准，她直認不諱：「其實佢都好想知道媽咪同埋爹哋喺度做緊啲乜嘢，我而家已經當佢係一個小大人，每日返屋企都會同佢講下我今日做咗啲乜嘢呀？我有啲咩感受呀？希望佢都會習慣，以後有咩事都同我講，所以就算爸爸拍嗰啲16歲以下唔畀睇嘅電影，我哋都會喺旁邊引導畀佢睇，等佢知道我哋兩個做緊嘅嘢。」
Emme又坦言兩夫妻生一個就夠曬數，從來沒有二胎計劃：「講真我哋兩個都唔算係超級無敵鍾意小朋友，我哋嘗試過生咗一個陳真，佢又好得意㗎喎。我由佢兩歲問到八歲，想唔想要一個細佬妹呀？佢一直都堅決話唔要！如果你驚我悶嘅話，帶啲friend返嚟屋企玩咪得囉。佢又會話唔想再陪啲小朋友睇嗰啲baby channel，所以我哋都係一個就夠曬數。」
Emme講到在今年暑假送了陳真到軍校訓練，令他獲益良多：「因為佢由到大都未試過喺出面過夜，今次一去就去七日，返到嚟好似大過咗好多，有陣時仲會搶住摺晒所有被，同埋最大嘅成就，將佢一直嘅寒背改善咗，我哋話八年以嚟，都未見過佢企得咁直，簡直係值回票價呀。」
