黃子華、許冠文、衛詩雅及周嘉怡等人出席電影《破‧地獄》首映禮。黃子華跟許冠文自《神算》後再合作，子華神說：「覺得是很奇妙命運，因為經30多年很迂迴行各自的路，現在再聚在這一點，這套戲再帶到我們到東京電影節。」他說這套戲值得去到全世界，仲話香港其實有好多標誌特色，「第2套標誌特色戲，我就想拍套《打小人》，唔好同我爭，OK？係咪扮女人我未知，但我講緊許冠文做，我做小人，如果有人拍《打小人》，就係抄襲我哋。」
《破‧地獄》試映場好評，許多影評也一致讚賞這部探討生死、在世的人需反思，與及人與人的關係，或者在宗教及傳統議題，都處理得不俗。
許冠文說自己看劇本時都已經喊，他稱導演堅持拍不太傾向笑的喜劇，而自己就比較傾向笑多些，他說：「其實𠵱家笑唔笑都冇乜所謂，點好笑都唔夠社交平台幾分鐘啲片好笑，當街市阿婆都識拍嘅時候，要拍咩喜劇係一個問題，呢個就係未來喜劇模式嘅第一套，我多年來冇拍戲，因為尋求新喜劇形式，而呢部戲好接近，以前啲戲誇張搞笑，已經過咗氣，𠵱家觀眾需要睇好似《破‧地獄》咁有新意。」
黃子華笑稱要向香港政府提議，除了大時大節放煙花外，其實都可以在維港中心破地獄，他說：「香港需要輪迴，許冠文已經話好願意做喃嘸部分。」許冠文亦笑不止香港人要破地獄，香港現在面對困難，都需要破地獄轉型，「意思係將以前仇恨、驕傲一切放低，好似道士重新上路。呢個儀式叫破地獄，尋求新突破，就好似特首時時講轉型，所以香港700萬人都唔應該害怕，只要放低以前漏洞同傲慢，重新上路就得，一定有一條路，因為香港人係好勁㗎！」
為電影包辦詞編監主題曲《普渡眾生》的林家謙亦現身首映，他說初寫demo時已有幾句歌詞出現在腦海，「好似輪迴塵間的人，當時已咗出嚟，然後我放低咗一陣，有次去行山，見到棵樹斷咗根，就有靈感寫落去喇。」講到與許冠文首次同場，家謙直言想同這位前輩打招呼，「我想，但佢瞓咗未？走咗未？」問他如果見到面，會如何介紹自己，家謙秒答，「會話我同你同一日生日，係同月同日生！係緣份呀！」
