唱作歌手黃明德（Dark）今日（16日）推出由自己作曲、小克填詞、Jerald監製及編曲的全新作品《框框》。Dark表示這是他第一百零七首demo，「每一首demo我周不時都會聽返，睇吓邊首可以做到、邊首可以令公司揀中、邊首可以令其他歌手揀中，逐漸逐漸依家已經差唔多有三百首！」
以往Dark亦參與自己作品的作曲部分，不過都是跟其他音樂人以合作形式發布，這次是他真正以個人身份發布的作品，而且經過重重篩選。創作期間，Dark更因為交了多首demo，都未能通過公司A&R同事一關，產生了衝突，「我記得嗰陣時作咗好多首歌，佢（A&R同事）首首都話唔得，有一次我燥燥地話『咁你想要啲乜呀？』佢就話『作一首鬧我嘅歌囉！』我記得好似用咗幾個鐘就作到，然後交俾佢，佢就話『係囉！我就係要呢啲咋嘛！』嗱，講到好似鬧晒交，但其實我哋係好friend嘅，哈哈！」Dark坦言，隨着寫歌的數量增加，他的創作方向愈見清晰，更愈來愈有目的性，當中亦有反思，「例如好想快啲俾人揀中、好想俾人認同自己，但慢慢失去咗自己元素，好多都唔係自己想表達嘅嘢，到依家出咗《框框》，先提醒返自己，寫歌最緊要表達到自己，任何創作都係。」
為配合歌曲，MV以行車隧道為拍攝的主場景，「有一個好似無盡嘅感覺，亦都好多謝公司嘅努力，可以借到呢條隧道拍MV！」除了隧道，Dark坦言最愛自己困在一個大盒內「咪嘴」的shot，「新奇又有趣，MV最尾我走出咗一個框框，但其實係走向一個更大框框，所以最後嘅意義，除咗想同大家講要打破框框，其實呢個世界有無限咁多個框框，俾你慢慢去打破，呢條路係有排行！」
此外，MV中的演員，原來全部都是Dark的大學同學，不過由於拍攝時間緊迫，拍攝期間Dark未有太多時間跟同學互動，令他大感遺憾，「因為除咗拍MV，我都會影吓啲相，拍一啲IG reels，我冇乜空閒時間同佢哋做一啲互動、傾偈，呢個係少少遺憾；同埋中間我有少少對唔住佢哋，因為真係拍到over run喺隧道，要開返條隧道行車，之後我直接走咗，冇同佢哋say Goodbye，本身諗住拍完後同佢哋食早餐，但最後架車直接去我屋企，所以冇咗件事，之後我淨係可以短訊同佢哋講『今日辛苦你哋啦！』不過之後會請佢哋飲咖啡、食吓魚蛋燒賣！」