現年48歲的歌手黎瑞恩（Vivian），去年生蛇生上眼，近日她做全身檢查時卻發現胰臟真係有兩個瘤，認真黑仔。Vivian昨晚（17日）於Facebook發文透露早前進食感到不適，初時懷疑自己有幽門螺旋菌或是腸道有瘜肉，「人生第一次做全身檢查就係40歲。報告出咗，所有嘢都正常，唯獨是見到胰臟有啲陰影，最後再作詳細檢查後發現胰臟真係有兩個瘤。」
她指醫生表示通常末期才看到，幸好暫時是良性。她更指︰「醫生話因為一個喺頭、一個喺尾，要切嘅話，喺頭嗰個黐住其他器官，所以每個器官都要切三份一。」而她亦沒有藥吃，醫生着她保持心境開朗，每6個月檢查一次，「頭兩次我都好乖，但係諗諗吓照CT都有輻射。照多幾次本來冇嘢都變有嘢啦，最後我選擇對呢兩粒嘢不聞不問，總之每日就當『過一日、賺一日』開心就得啦。」
近日Vivian因肚痛入院，檢查後竟然發現胰臟兩粒腫瘤消失了，她大感神奇，「我即刻開心到癲咗，問咗自己好多次點解….點解…唔理咁多喇，原來唔好諗埋咁多冇謂嘢及負面嘢，真係可以醫病㗎！所以我想同大家分享我嘅諗法，希望無論患咩病嘅朋友講，大家唔好絕望，放鬆及樂觀，凡事都有可能。」她指今次真的要開香檳慶祝，同時又感謝醫護人員，以及 舞台劇《男人四十CEO》眾演員的體諒。
部分圖片來源：黎瑞恩@Facebook
