成名要趁早。麥浚龍（Juno）17歲已經入行，唱着《愛上殺手》出道，由少年進化至男人，事業上的多重身份，歌者、演員、編劇、導演、老闆於一身，最近為12月的演唱會積極備戰，當然還有他第二部執導作品《風林火山》也快將上映。
今年四十歲的Juno，問他現在覺得甚麼最重要？他簡單而肯定的說出「快樂」兩個字。不用甚麼驚天動地，「要個人快樂，你produce出來的東西，才是你最驕傲的！」日常事兒，如每天起牀看見愛貓，已足夠令他快樂。
12月5日將於會展舉行兩場《The Album:In The Name of a Father.》演唱會的Juno，每次開騷都有主題配合，是影像與音樂的體驗，今次演唱會回帶至《The Album》，這個一年一張專輯的三部曲企劃，當年的麥浚龍是董折、謝安琪是蒲銘心，今次演唱會可說是一個「番外篇」，以董折女兒董蒲的視覺，感受父母的感情，以及一段父女感情。Juno說，這個章節，其實是當年製作《The Album》時抽起的一章，「當時撞正COVID，錄音室唔開，因為《The Album》裏面人物眾多，我當時produce緊另外歌手嘅vocal，變咗我有一系列嘅歌做唔切，代表我只能夠將某一個章節抽起咗，呢個冥冥中就係創作，總會有唔完美情況出現。」
這篇未完的故事，成為今次演唱會的主題，「佢唔係講愛情，講緊董折同個女嘅關係！其實當時文案裏面，已經有呢個伏筆，佢個視網膜係換咗佢爸爸嗰隻眼落去，所以呢個係當時一個伏筆。佢唔係探討緊董折、蒲銘心愛情關係，反而係一個女孩長大，佢爸爸已經過咗身，佢對爸爸有種不解亦有好多唔了解，而因為一件事情發生，令佢從中了解呢個爸爸，呢個係幾親情related嘅章節。」
愛貓離世不捨難過
觸及父女感情，Juno亦有自身投射，他視愛貓為女兒般，去年經歷了牠的離世，令Juno十分不捨，「當然我冇小朋友，我覺得唔一定要經歷有小朋友，先可以寫到一段同小朋友之間感情，等同我嘅貓，佢其實就係我嘅小朋友，因為大家每日相處，好多好細微事情，例如我開心、唔開心，佢離開之後衍生嘅情緒，呢啲全部都係好赤裸情感，我同我嘅貓有種最切身感受，嗰種係單方向，你同佢講嘢，佢唔會講到嘢，但佢行為會show到俾你睇，佢嘅性格、情緒，所以嗰種情感，我覺得雷同（父女）！」
2018年開始的《The Album》三部曲，還有再之前與謝安琪的《羅生門》大熱，都是Juno音樂歷程重要一頁。問到《The Album》是否念念不忘的心中最愛？Juno卻說不是，回看自己的音樂和電影事業，不同階段都有不同重要性，「無論電影或歌或文字都好，我係第一個觀眾，所以好難去同觀眾同步，因為我對《殭屍》嘅睇法、我對《The Album》、對《Addendum》，或者我以前其他的專輯，好難去區分誰最重要。我覺得好多時候都重要，可能嗰一個moment，你覺得唔算好significant，但其實係喎！由出道到音樂界別十周年，同時間亦出現咗《殭屍》呢部電影，《殭屍》之後，因為參與咗劇本同導演，令我對造歌題材又寬闊咗，之後出現第二部導演電影，拍完就衍生《The Album》！如果話我十八歲時候，我冇可能做到《The Album》呢個企劃出來，因為當中牽涉好多人與人之間故事，要有某種經歷先幻想到！」
在乎的不一定大事情
今年踏入男人四十，Juno有哪些人生清單要完成？「都多㗎！唔係全部都同工作有關係，有唔同地方我想去，我想養多啲貓，好多好多……唔可以話係大事情，有時候在乎嘅，唔一定全部都係大事情，我覺得當然有好多bucket list都要做！」Juno說，不同時期都會有不同的喜悅，「譬如電影裏面，見到文字寫完之後，到實體化我見到個景，或者漫天飛雪效果，係唔同stage嘅喜悅，寫嘅時候有一種喜悅，去做前期嘅時候，又有另一種喜悅，因為你幻想緊嗰件事，到你真係見到嗰件事，又係另一種喜悅，我係鍾意成件事，我幾enjoy成個過程。」
現階段的Juno，覺得最重要的是甚麼？他好肯定的說：「快樂！」能夠令他最快樂的，都是一些日常不過的事情，Juno說：「所有日常嘅嘢，我起身見到我啲貓，我又好開心，以前我會好工作oriented，開唔開心都好，以前對工作嘅衝衝衝，會漠視咗自己到底係咪真係快樂，依家我覺得，你要個人快樂，你produce出來嘅嘢，先至係你最proud of嘅！」終於學懂放鬆了？「其實我都唔識用邊個詞語去形容，我覺得係一個整體感覺！每一個作品都有佢條命，到底佢出到街嘅時候，佢會唔會即刻被認可呢？我相信好多人都希望首歌出街，佢會立即得到一個共鳴或者肯定，但確實有啲歌，可能要用時間去培養一種共鳴，出街時候佢（聽眾）唔明，但三年之後佢（聽眾）明，我覺得呢啲都有發生過，亦都有啲歌一出街嗰一晚，已得到好強大共鳴都有。」
化妝：Janice Tao
髮型：Powder Room
形象：NiNi
場地：Rosewood Hong Kong
