陳慧嫻將於明年1月底，在紅館舉行40週年《The Fabulous 40 Priscilla LIVE IN HONG KONG陳慧嫻演唱會》，慧嫻過去9年都沒有舉辦演唱會，所以今次聽到開騷消息，也讓歌迷們非常雀躍。
踏入40週年，陳慧嫻今次演唱會用了「花」作主題，由初開到盛放，展現不同階段歌唱事業上的轉變，連演唱會海報都化身為一朵超級大花，以一朵花的姿態，加上她的經典歌曲，帶大家穿越季節的輪迴。慧嫻表示，「以前演唱會，好多唔同造型我都試過，今次好想做返一個純綷嘅自己，音樂部分樂隊陣容強勁，仲會有弦樂合奏。我覺得我嘅事業，都好似一次又一次嘅花期一樣，縱使每一次去到花期完結，大家覺得我好似會消失，其實我只係自己匿埋咗好好準備自己，等待下一次花期出現。其實每一個人嘅人生，都好似花期一樣，總會有高有低，但我非常幸運，因為fans總會好有耐性，期待住我每一個花期出現。」
相隔9年再踏紅館，她大方分享今次會是四面台的舞台設計，與觀眾拉近距離，慧嫻透露，「目前我們已經籌備演唱會流程，可以講少少，會有一part好特別，我同3個自己跳舞，但要賣吓關子，哈哈！到時入場先知係點樣同3個自己跳舞。歌衫設計，據知都有啲好重好大件，設計師Kenneth又要我露肉（笑），所以唔單止減肥，仲要鍛鍊肌肉承托力。我最希望可以減廿磅啦，哈哈！聽日開始閉關跟營養師減，狂做運動咁囉，今次會跳好多舞呀，有part十幾分鐘medley，簡直挑戰人生極限。」
問到演唱會嘉賓，慧嫻話：「軒仔成日話由細聽我啲歌，又話好想嚟我演唱會唱，我都好希望佢嚟囉；我又想Twins一齊嚟玩《跳舞街》，仲有AGA作咗首新歌俾我，我都好想同佢一齊玩！以前同年代歌手，克勤、草蜢、學友呀，都請過，成日勞煩佢哋又唔好意思，今次試吓邀請下新一代囉，仲有好多小鮮肉，我都好鍾意，魏浚笙（Jeffrey）我覺得佢好靚仔呀，哈哈！唔知可唔可以邀請佢呢？」再問到慧嫻的好朋友蔡一傑最近生病，她就表示：「傑仔好好呀，我有問候佢，大家唔使擔心，佢好快好返啦！」