Henry陳獻略是香港排球運動員，中學時加入港隊代表香港出賽，更成為首名外流的香港職業排球員。
不過Henry自小與娛樂圈很有淵源，4歲時被星探發掘拍廣告，6歳已和四大天王的黎明在廣告合演，飾演他的童年。
香港電影市道自去年遇上不景氣，不少電影公司都難以開拍新戲，不過仍然有新面孔出現，身高181cm，陽光俊朗外形的Henry陳獻略，由運動員轉型幕前，去年正式出道，一連接拍三套電影，雖然不是主角，但有機會與一眾前輩如古天樂、梁詠琪、袁富華等合作，他坦言獲益良多。
Henry時現簽約與梁詠琪同屬一間經理人公司，力捧為電影新人，Gigi對後輩亦十分照顧，經常給予機會，早前在香港舉行五場side track音樂會，每晚都有一part讓Henry在台上演獨腳戲，Henry說︰「跟Gigi和她的經理人認識後，覺得大家的理念都好相似，好快就開始傾合作，跟Gigi先後在電影《臨時決鬥》和《逆轉上半場》合作，我覺得Gigi係一位好放手俾我去試嘅前輩，有時候同佢傾一啲角色嘅需要，佢會先反問我意見，係一個很好嘅聆聽者，跟住就會從大家睇法再決定，佢會用一個好soft嘅方法引導，喺佢身上真係獲益良多，亦好願意俾機會新人，上年佢嘅side track音樂會，亦俾咗一個很好的舞台經驗俾我，演咗五場live嘅獨腳戲，甚至搵咗佢嘅御用排舞師，幫我編排一段沒有對白，要用肢體動作表達的一段小劇場，好多謝Gigi咁放心俾呢個重任交俾我。」
與談善言、林家熙、袁富華合演的新戲《搗破法蘭克》即將上映，Henry在戲中飾演大反派，為了突出效果，Henry要戴上特製隱形眼鏡，讓外形粗獷一點，「呢套係一部動作犯罪電影，戲入面飾演一個集團入面聘用嘅專業殺手，第一次做反派，亦都第一次有動作場面，一個好新嘗試，造型上都好特別，因為角色係左眼失明，一埋位就要戴上特製隱形眼鏡，但原來好難聚焦，要好集中演戲，唔可以鬥雞眼。」
身高181cm的Henry，由中學開始接觸排球，在南青時擔任二傳手，同時亦是香港排球代表隊成員；23歲獲泰國第二組別職業聯賽球隊的泰國蘭實大學排球會簽約，成為香港首名海外職業男子排球員，又曾獲選第五屆傑出少年選舉優異奬。
回想接觸排球這項運動，Henry直言︰「講出嚟都幾低B，其實原本係打籃球，但因為我每次去籃球場都俾人蝦，所以就走咗去排球場，打下打下就加入咗一啲比較實力強嘅球隊，又有跟一啲大教練，再有機會去泰國集訓，加入當地職業隊，又有一個唔錯offer，打咗一年左右，始終香港排球呢個項目比較局限，香港做職業排球運動員係冇收入，不過排球已經係生活一部分，就算依家入咗行，都會繼續教排球。」
Henry說父母由小都大，對他每個決定都十分支持，無論演藝或運動，父親從來都沒有反對，在Henry四歲的時候，已經有星探邀他拍廣告，「其實我第一個幕前演出都係媽咪幫我接，我細個都幾趣致，有日同媽咪行街就被星探邀請拍廣告，媽咪帶我去casting，之後就一直有廣告邀請拍攝，六歲嗰陣拍咗一個電器廣告，主角係黎明，我做佢童年角色，我仲好記得當時喺大浪灣村拍攝，好多好多fans同村民到現場睇黎明，見識到九十年代四大天王嘅威力，佢仲同我照咗張合照添！」
髮型︰Sam Lo @Orient4
化妝︰JustineTang @NDNco.
場地︰省略號Ellipsis Cafe & Lounge
