關楚耀（Kelvin）去年520宣布向拍拖6年的網紅女友Joann求婚成功，並在11月註冊成為夫妻，求婚一周年紀念日剛過，Kelvin原來已於周日（26日），於泰國布吉舉行了夢幻婚禮。
Kelvin與老婆Joann、家人與一眾朋友等，上周六（25日）出發到布吉，並先舉行婚前派對，翌日早上進行接新娘儀式，下午4時正式舉行婚禮。兩人在草地行禮，主婚台放滿白色鮮花，搭配藍天與碧海，襯到絕。
本周三（29日）Kelvin接受《明周》訪問，詳談婚禮細節，他在電話中開心表示︰「呢個婚禮真係『無價』！籌備咗九個月左右，始終海外搞婚禮都有難度，好彩有個wedding planner幫手。我哋香港泰國兩邊日日send相，仲要同各位兄弟姊妹講句感激不盡，大家都特登飛過嚟出席，當日天氣非常之熱，大家著住禮服都濕晒！」
Kelvin說婚禮前一星期都非常擔心，因為當地天氣不穩，「因為晚上要放煙花，又整咗個花拱門主禮台，好驚落雨。前一日準備好多雨傘，好彩當日天公造美，藍天白雲，好夢幻呀！」Kelvin在台上宣讀愛的宣言：「未來嘅日子，請你繼續愛我、提點我，我承諾，我會保護你一生一世。多謝岳父岳母，生咗Joann咁聰明、咁孝順嘅女仔。多謝我爹哋媽咪同埋妹妹，經常都容忍我、遷就我；多謝妹夫、妹夫屋企人咁照顧我哋。」Kelvin和Joann感動爆喊，場面浪漫又搞笑。
談到最感動一刻，Kelvin說接新娘時已忍不住眼淚，「其他兄弟結婚都試過接新娘玩新郎，到自己真係結婚做新郎，睇住班兄弟玩又感動又開心，笑中有淚，同老婆講誓詞時，大家都講到喊，講第一兩句已經喊晒！」
婚後逗留當地玩幾天後，Kelvin便馬上回港工作，「上年求完婚，其實一路都諗住有時間一定要搞返個婚禮，之前可能覺得搞婚禮好麻煩，盡量唔好搞咁多嘢啦，但係今次所有嘢都係我同佢兩個人合力完成，當然老婆佔好大功勞，好多嘢都係佢諗，依家先真真正正結咗婚，終於成為人夫，所有嘢都放心晒！工作上會更搏，為屋企人、為家庭，亦希望好快有小朋友啦！」