甄子丹與汪詩詩的二十歲大女甄濟如(Jasmine)，去年加入樂壇成為唱作歌手，唱片公司當時隆重其事，於新加坡為Jasmine舉行全球出道發布會，出道專輯的八首歌曲全部由她參與創作，這位「星二代」用作品說話，希望憑實力讓樂迷認識「甄濟如」。
對於「星二代」的標籤，Jasmine坦言這是不可改變的事實，「冇得改變，我真係『星二代』嘛，我都好appreciate，覺得好lucky，可以做到自己夢想嘅dream career。」
父親是國際武打巨星、母親是超模出身，但演戲和行catwalk她都沒有興趣，「爹哋唔會教我功夫，佢話太辛苦喇，其實好多人會問我將來想唔想試下做演員？但當我試過拍MV之後，我更加知道自己唔係好適合做演員，特別演愛情故事，我唔係好自然，可能拍喜劇會好啲；而model行業就興趣不大，我會好欣賞fashion，但我一直都只想做音樂。」問Jasmine知不知道父親因電影《葉問》有「宇宙最強」的稱號？「我知，我都聽過，因為佢真係宇宙最強，哈哈！不過，喺屋企我媽咪係宇宙最最強囉。」
「我哋屋企好嘈㗎」
Jasmine從小已經喜歡音樂和舞蹈，三歲很沉迷迪士尼的歌曲，最鍾意《Lion King》、五歲開始學鋼琴，已經拿到八級，Jasmine謙虛地說︰「我細佬先是鋼琴高手，其實我全家都識彈鋼琴，媽咪爹哋細佬，所以我哋屋企好嘈㗎，細佬彈琴風格比較strong和powerful，好大聲，我就會唱歌，所以爹哋會搵另外一個地方自己去彈，哈哈！」
性格屬怕羞型的Jasmine，家人沒有想過她有勇氣踏上舞台表演，直至Jasmine 九歲的時候，首次在姨姨汪圓圓的婚宴上獻唱，「阿姨知道我喜歡唱歌，就邀請我在二千多名賓客面前獻唱，我一口答應，媽咪知道後很緊張，佢第一句就問我『Are you sure？』唔知點解，我一上到台，就覺得自己係Beyoncé，突然間好有信心，當晚我唱咗Adele《Rolling In The Deep》，屋企人都很震驚，仲感動到喊，因為佢哋從未見過我呢一面。」想不到Sony Music 大中華區CEO Andrew Chan當晚也在席上，當時已看好Jasmine是未來之星，十年之後，終於羅致Jasmine加盟Sony Music旗下RCA Records (大中華地區)，並帶來出道單曲《idk》。
把感受寫進歌詞
創作音樂的原因，是因為Jasmine小時候不懂得表達自己，每次有感受想抒發，就把感受寫進歌詞，至今已完成七十多首原創歌曲，她解釋︰「因為我講嘢唔叻，唔識表達自己，所以我會寫低想講的東西，慢慢就開始寫歌，家人都知道我好鍾意音樂，但冇諗過我將來會選擇做歌手，到我十五歲就自己決定一定要去Berklee College of Music（國際知名音樂學府伯克利音樂學院）讀大學。」不少著名音樂人如鮑比達、伍樂城、PSY和Gareth.T都是在這間學院畢業，Gareth.T是Jasmine的小師兄，「我哋見面有傾返，原來我哋應該係同一個dorm（學生宿舍），當然希望日後可以跟他合作。」
今年Jasmine首次推出廣東歌《次次》，找來出爐金馬影后鍾雪瑩為新歌填詞，Jasmine分享創作過程︰「製作demo時用英文歌詞，之後鍾說（鍾雪瑩筆名）幫手將內容翻譯，再完成歌詞的部分，未合作之前我已經係鍾說fans，開會之後佢問咗我嘅生活習慣和日常喜好，就寫咗《次次》歌詞，我好感激佢寫呢份歌詞俾我，將我性格融合，又保留咗首歌嘅青春氣息。」
「星二代」鐵三角
首度灌錄廣東歌，對於不諳廣東話的Jasmine來說相當有難度，她坦言︰「今次係錄音最慢嘅一次，到拍攝MV當日都仲未錄完，一班同事同我一齊練發音，執我咬字。」新歌MV找來林愷鈴的胞弟林卓毅粉墨登場做男主角，原來她與林愷鈴、陳康堤三位「星二代」是圈中閨密，「成日都一齊聚會，會講下音樂，講下二十歲女仔嘅conversation。」《次次》這首歌有中英文版本，英文叫《Z》，代表Generation Z，「講緊Gen Z嘅女仔，所以都用咗好多平時大家message會用嘅詞語，我好鍾意Girl Power，我覺得最能代表係梅艷芳，佢任何一首歌我都好鍾意。」
化妝︰嘉玹.小白
髮型︰Kayan Lo
形象︰Cherry Mui
