女團VIVA成員姜咏鑫（Ada）今個月生日，早前她便迎來入行後首個由粉絲為她舉辦的生日應援，早前Ada更親身走到茶舍打卡，見到現場佈置，令她驚喜大呼：「原來有咁多人錫我！」
Ada坦言，以往生日都是收到message或fans的DM祝福，生日應援是人生第一次，「今次佢哋幫我整咗個茶飲店嘅應援，有手幅、鎖匙扣、postcard，呢啲都係第一次發生喺我身上，所以都係一個surprise。」Ada落舖打卡當日，有歌迷聞風而至，現場跟她唱生日歌、切蛋糕及送上禮物，Ada表示：「所以今年俾我嘅感覺超級唔同，而且覺得『吖，原來有咁多人錫我！』嘅感覺！」知道歌迷於一個多月前已開始籌備，Ada除了感動亦十分識做，當日自掏腰包請全場fans飲茶，以示謝意。
她又謂在生日應援上看到很多「新」面孔最令她開心，「見到有好多新面孔，但我問返佢哋，原來其實係舊面孔，係喺我之前參加比賽完嘅一個市集見過面，過咗咁多年之後，我成為女團，我生日，佢哋都特登到場送上祝福， keep住咁耐都有人支持我嘅感覺，呢一樣嘢令到我好開心！」
至於生日願望，Ada先大賣關子，「可能對我嚟講係好事，對其他人唔知係唔係一件好事，哈哈！」原來她的生日願望，是希望將來VIVA每位成員的生日都在工作中度過，她解說：「一嚟喺工作中度過，代表我哋有job，同埋我哋可以一過生日；二嚟就係Ｍani（霍汶希）有講生日有job接嘅話，係一件好事，代表嚟緊keep住一直有錢賺，所以我覺得係一個祝福，大家生日嘅時候，不如一齊搵錢、一齊賺錢！」
