陳毅燊（ANSONBEAN）推出最新派台歌《GET WILD》，歌曲內容講述開party、玩、飲酒，更請來吳家忻（kayan9896），以及本地知名Rapper AKIKO，共同合作新歌。
問到會否配合歌詞內容，飲返兩杯才走進錄音室錄歌，ANSONBEAN和AKIKO齊齊耍手擰頭。ANSONBEAN自爆試過飲少少酒去錄音，發現飲酒令喉嚨收緊，唱不出水準。而AKIKO表示身為Rapper太多歌詞要記，怕飲酒太放鬆會忘記歌詞，反而錄完音才去飲酒慶祝。相反kayan9896直言要靠酒精開聲兼壯膽，她說：「我會飲一杯紅酒幫助開聲，之前有朋友教我咁做，同埋頭先拍MV，一埋位就要跳舞，因為未熟習環境，所以都飲咗一杯酒先埋位，幫手壯吓膽，今日應該陸續有嚟，哈哈！」
對於酒後做過最瘋狂的事，kayan9896坦言小心，不會與陌生人飲酒，只會在相熟朋友陪伴下飲醉。而兩位男士就有過最不堪回首的經驗，AKIKO說：「有次慶功飲到好醉，坐的士返屋企途中，忍唔住叫司機放低我，我喺條街足足瞓咗一個鐘，感受到咩叫天旋地轉，自此我以後唔敢飲咁多。」旁邊的ANSONBEAN接住說：「試過同朋友去卡位OK，我飲醉嘔咗落我朋友對鞋同袋。點樣返屋企？唔記得，因為『斷咗片』。」
