韓國女團AOA前成員權珉娥曾自爆遭AOA隊長申智珉欺凌長達10年，致患抑鬱症及恐慌症。上月底更被發現試圖輕生，失血過多一度陷入昏迷，好彩搶救已經冇生命危險。珉娥日前終於清醒，今日再度喺IG撰文強調自己係受害者，更指自己唔係唯一嘅受害者。
珉娥
珉娥今日喺IG upload同申智珉同期練習生嘅對話內容，對話內容指當時對方都遭受過申智珉欺凌，練習生時期大家都要睇智珉眼色，形容智珉似「飛仔」。更表示會為珉娥做證，指證申智珉人格問題。
珉娥指自己雖然已經多次解釋被AOA隊長申智珉欺凌，但仍有唔少人控訴佢係神經病，甚至係加害者，招致更多攻擊。珉娥重申指自己係事件中嘅受害者，亦唔係唯一嘅受害者，但佢係撐得最耐嘅受害者，會繼續證實自己嘅發言唔係大話。珉娥又提到網上嘅不實傳言令佢深受打擊，已經委託公司截圖蒐證，準備提告，會對所有散播謠言嘅人進行起訴，「甚麼是真的，甚麼是謠言，我們就用法律訴狀來揭開吧。」
圖片來源：珉娥＠Instagram
