早前已宣布休團的C AllStar隨昨晚最後一場紅館騷結束，團體正式休團，暫別樂壇。四子昨晚邀請鄭秀文（Sammi）助陣任嘉賓，合唱Sammi的〈最後一次〉，充滿意義。
Sammi在台上笑問：「其實咩叫休團？休妻我就識，休息我又知。」C AllStar解釋是暫停用團體名義去做音樂，暫時休息一會。Sammi聽後補充：「休息只為走更長嘅路。」及後Sammi表示想為四子打氣：「你哋今晚揀〈最後一次〉同我合唱真係好有意思，我好想比啲鼓勵，因為我覺得一個團體經歷咗咁多嘢，去到七年要暫休，對於你哋四個都係新開始。可能歌迷未必知道，其實佢哋呢份勇氣好大部份都係嚟自你哋呢班歌迷。希望佢哋有咩個別發展都好，繼續支持佢哋！」