林芊妤（Coffee）日前喺Story問大家有冇本地姐姐介紹，仲透露工人姐姐忽然遞上辭職信。因為佢發現姐姐餵囝囝翟德彥（翟伯伯）食飯嘅時候，成日開電視又俾電話囝囝睇，但係姐姐就講大話，唔認之餘更發脾氣扔毛巾，最後同Coffee講自己唔識湊小朋友，叫佢另尋姐姐幫手。
正當Coffee為再請工人而煩惱之際，姐姐居然向她道歉，最終傾掂數留低，Coffee昨日喺社交網留言︰「多謝大家既關心呀，我而家唔使請新姐姐啦，姐姐唔走啦。」之後又重提事件，坦言有向姐姐表示謝意，感激呢兩、三年嚟對BB嘅照顧，令佢可以放心外出工作。
Coffee交代原來工人姐姐覺得佢嗰日態度唔好，遞辭職信其實都係意氣用事，唔係真係想走，所以唔使請新姐姐。工人姐姐都應承Coffee以後有啲咩都會同佢講，唔會再為方便、唔使煩而講大話。
Coffee最後選擇相信工人姐姐，加上佢係第一次犯錯，「每個人都有機會犯錯，姐姐都會有脾氣、攰、唔舒服，同埋佢離開印尼咁耐都可能好掛住自己個仔，情緒唔係咁好，變相有時會有少少脾氣。」Coffee又稱，諗緊請多個姐姐幫輕對方，所以都會繼續Interview搵新姐姐。
圖片來源：林芊妤＠Instagram