Do姐狂跳「天空甲板」 細貓畏高嚇到腳軟

Do姐細貓在首爾「樂天世界塔」天空甲板留影。

HOY TV旅遊節目《去邊啊Do姐》最後一位嘉賓應智越（細貓）今晚（19日）登場，鄭裕玲（Do姐）甫到埗就化身導遊，急急腳帶細貓參觀首爾著名摩天大樓，樓高123層的「樂天世界塔」。二人乘搭大樓內號稱「全世界最極速雙層電梯」，只需1分鐘就升至頂樓，電梯一邊上升，一邊播放過山車等動畫，非常適合打卡。上到樂天世界塔海拔486米的觀景台，首爾城市盡收眼底，不過觀景台的「天空甲板」原來是由玻璃打造，腳下就是首爾街道，細貓自爆非常畏高，看到玻璃地板立即「腳軟」，Do姐專登捉住細貓一齊原地跳，更笑指細貓嚇到「瀨尿」。

Do姐又帶細貓品嚐精緻料理（Fine Dinning），細貓自爆從來未食過，所以對餐桌禮儀毫無頭緒；Do姐細心指導細貓，食高級料理要細口細口食，每一道菜亦要配適合的酒。細貓亦有貢獻，教Do姐韓國人飲酒的禮儀，例如持酒杯時要用左手按着右手，對住前輩更要打側身飲以表敬意。細貓又回憶當年在韓國當練習生7年生涯，需要嚴格控制飲食，每天只可食一條香蕉和一件雞胸，已經養成了對飲食沒有慾望。

細貓曾經在韓國當練習生，每天只可以食香蕉雞胸。

二人又去了一間未開業，以沉浸式藝術做賣點的餐廳試全蟹宴。餐廳的四周都有巨形電子屏幕包圍，幻影燈光隨着食物及天氣而有變化，一邊進食一邊享受七彩燈光show，細貓認為環境「靚到好似拍MV咁」，Do姐雖然經常食高級西餐，但今次亦表示「大開眼界」。

二人到「沉浸式藝術」餐廳試全蟹宴，燈光隨菜色變幻。