李幸倪（Gin Lee）日前拍攝電視機廣告，她自爆原來這是她入行以來首個電器廣告。為了隆重其事，她特別請來排舞師到現場，「今次係我第一次拍電器嘅廣告，都係好重要嘅，所以會想做好佢。今次因為需要拍一啲跳舞嘅動作，所以我搵咗個排舞師去幫我排咗一啲動作，想出嚟嘅效果好啲，最緊要係拍得型！希望大家睇到嘅時候有驚喜。」
提到對電視要求，Gin坦言要內外兼備，又表示自己經歷過不同年代的電視機款，從「古董大牛龜」到愈出愈薄，至現在的smart tv，「又上到網、又可以喺電話play，而家方便好多。」Gin更自爆自己是煲劇精，一煲劇可以睇足幾日幾夜，更大爆媽咪是電視精，一日可以看足十多個小時，「我媽咪好鍾意睇電視！一日要睇十幾個鐘，以前屋企得一部電視，就要爭，但係又唔夠佢爭，咁我哋就冇得睇，哈哈。所以而家屋企一定要有幾部電視，最好每一間房都有，咁個個都可以睇到電視，如果唔係冇機會睇，哈哈。」