MC爆響口開個人演唱會 古巨基借保養問題公開冧妻 「古太臨瞓前會幫我搽面」

古巨基音樂企劃「I Really Love To Sing」第二炮請來MC張天賦合作，二人昨晚仲於ig開Live為粉絲解構新歌《自我安慰》、MV拍攝及合作契機。

MC話這次跟基仔的合作十分「夢幻」，因為從小便聽他的歌，沒想過竟然能夠有機會一齊合作，仲覺得好神奇古Sir，「咁多年嚟一啲都冇老到，睇番《飄流教室》個MV，直至《自我安慰》個MV，個樣其實係冇變過㗎！其實你有冇一啲保養嘅技巧？」基仔話MC還年輕，未有需要用到保養技巧，隨後卻靈機一觸，答道：「呀！我知啦！有一個保養技巧呀，就係娶一個會幫你保養嘅老婆呀！」MC隨即大笑，基仔續說：「因為我自己真係唔識保養㗎，每日古太臨瞓前或者我臨瞓前，會幫我搽晒啲面，排晒一枝二枝，我諗嗰度有四五六七枝嘢咁啦，由右到左，古太會話：『你而家未洗面呀，咁臨瞓前就自己搽啦。』如果我洗咗面，佢就幫我搽囉。我真係唔識保養，但如果真係要問我嘅方法，就係搵一個幫你保養到嘅老婆吖。」聽罷MC立即豎起手指公讚好，基仔借分享保養心得，同時又乘機冧太太，認真識做。

直播期間，有網民問到《自我安慰》前奏及中段過門均用上《記憶棉》的旋律是誰的主意，基仔解說是他在錄音時忽發奇想，「喺錄音嗰兩日裏面，聽聽吓突然覺得，既然我哋一齊合作，你嘅《記憶棉》又係關於感情上一啲失落，匿喺個被窩裏面，再接呢個《自我安慰》，好似係一個治療同解脫，所以我就同舒老闆（監製舒文）提議，再話俾你知，見你又鍾意，咁就啱晒啦。」
基仔又代MC粉絲追問：「我睇報道寫，你嚟緊準備有一個新嘅演唱會呀 ?」MC回應 :「係啦 ! 日子就未確實公布到啦。但係會喺一個都幾大嘅地方嚟既，會係我嘅一個個人演唱會，或者到時有你做嘉賓都唔定㗎。哈哈⋯我咩都唔講得住呀，大家期待下啦！」