《Katch Our Life WARNER! GO!》將於2月15日舉行，華納唱片動員12個歌手樂隊單位包括Dear Jane、陳蕾、洪嘉豪、MC張天賦、Gareth.T湯令山、Gigi張蔓姿、Kiri T、moon tang、Zpecial、Lewsz、Nancy Kwai歸綽嶢、Gordon Flanders 施展渾身解數，勢要炸爆亞博舞台！網上不少樂迷「猜測」歌單，華納三寶同台呼聲最令人期待。
雖然音樂會餘下個多月時間，但期間橫誇農曆新年，眾人「度期」綵排甚有難度，洪嘉豪笑言新春期間將聯同華納仝人「洗劫」Dear Jane 主音Tim及低音吉他Jackal : 「因為結咗婚嘅同事唔係好多個，仲要阿Jackal哥新婚，一定要畀佢感受『派利是』嗰種喜悅。」
陳蕾坦言新年要閉關練歌，亦為來年找靈感，「因為過去一年都好忙，冇咩時間可以喺屋企靜吓，可以把握機會喺屋企寫歌找數，又可以靜吓諗吓未來嘅方向！今次呢個騷好多Medley要唱，記極多嘅歌詞之餘，仲要好多舞台嘅走位，隨時難度高過自己嘅演唱會。」
早前眾人齊集公司玩遊戲，要畫出歌手心中的形象，洪嘉豪抽中畫師妹Moon Tang，他笑言「三秒鐘」畫完，事關對方「太細粒」輕易完成！張蔓姿將陳蕾變成「士多啤梨」眼，原來她覺得對方在台上永遠都是發着光。眾人畫功都好「獨特」，唯獨Nice@Dear Jane畫Zpecial成員煒賢最神似，將對方肌肉表露無遺！
MC張天賦對這次演出不敢鬆懈，表示農曆新年會戒油膩食物，「因為平時過年好多油炸嘢食，但係呢個騷同新年太近，我怕食太多會影響聲帶，所以今年就『清清地』過年。」問到這次演出哪部分時，MC對自己演出的部分保持神秘，並大賣關子，「聽聞所有女歌手會跳舞，Dear Jane 同Zpecial仲會Cross Over！」至於三寶會否同台，他表示：「大家幻想吓啦，到時咪知囉。」
Dear Jane主音Tim與樂隊兄弟「日日見」，過年期間想「抖一抖」，他說「其實除咗Dear Jane啲成員之外，其他歌手同事都因為School Tour日日見，所以過年不如陪吓老婆同仔女啦！今次呢個騷好多新嘅『組合』出現，到底邊個會夾邊個都仲未知，不過我哋Dear Jane夾咩人都得，到時有音樂自然好High！」
