《Katch Our Life WARNER! GO!》將於明年2月15日於亞博舉行，華納唱片動員一共12個歌手樂隊單位參與，包括Dear Jane、陳蕾、洪嘉豪、MC張天賦、Gareth.T湯令山、Gigi張蔓姿、Kiri T、moon tang、Zpecial、Lewsz、Nancy Kwai歸綽嶢、Gordon Flanders。
今次演唱會不同單位歌手Cross Over演出，MC表示今次音樂會「好睇」最緊要：「我同好多同公司嘅歌手都合作過，例如陳蕾、Dear Jane、洪嘉豪都合唱過，我最想同湯令山試吓，因為佢有好多天馬行空嘅創意，如果成真嘅話會好正，但如果超支就真係要加場先搞得掂。有人問如果呢個騷要跳唱嘅話，我係好需要一個女伴，所以我好誠意邀請陳蕾同我一齊嘅，我哋叫『PC』組！」
陳蕾聞言就話公司多創作歌手，沒想過要跳舞演出：「我冇諗過呢個騷要跳嘅，都係得moon同Nancy學過吓。我哋成班同事做過好多School Tour，後台都好熱鬧，大家都係健談嘅人，女仔就傾吓扮靚，男仔就傾第二啲嘢，反而我驚我哋太好傾，本來約好咗傾吓歌單，點知講講吓傾咗另外一啲嘢。」
這日歌手齊集影Poster，趣怪造型令人驚喜，歌手們碰面亦傾個不停，氣氛非常熱鬧！Dear Jane主音Tim ：「係咪都難搞啦，但咁先有火花，我哋計劃將後台搬上前台，俾大家睇到最真實嘅一面，可能淨係『吹水』已經覺得好搞笑。」
洪嘉豪則笑稱取代Howie，練好結他「加入」Dear Jane；湯令山與張蔓姿「互相吹捧」，笑言望能在台上合體演出，Gigi更謂想「炸裂舞台」：「我好想唱《CHOK》呢首歌，因為呢首歌跳辣身舞應該幾有氣氛！」
