Nancy Kwai去年中展開四季歌曲企劃，推出代表不同季節的歌曲，分別有春天的《Out of the blue》、夏天的《Let go》、秋天的《Cardigan》，來到最終章代表冬天的《I tried…》
為配合新歌及企劃主題，團隊特意前往日本北海道拍攝MV，這次更是Nancy第一次親身感受飄雪！Nancy說：「公司同我講，今次MV決定去北海道拍雪景嗰陣，我超級開心！因為我同落雪好冇緣份，我曾經試過好多次計劃去旅行就係睇落雪，做晒功課天氣預告話嗰段時間係會落雪，點知我去到就係冇雪落！所以我一聽到嘅時候，我好期待親眼見到落雪畫面，但一諗起咁浪漫嘅畫面，竟然係同同事一齊見到，我就有啲小傷心，哈哈！當我見到啲雪，喺天上面飄落嚟，唔知點解有種莫明感動！不過有個小遺憾，就係因為我哋拍攝MV嘅行程好趕急，所以冇時間可以好好感受落雪，冇得砌雪人又無得玩雪戰！」
MV講述Nancy希望透過和男主角相約旅行挽回戀情，可惜最後男主角未有現身，遺下Nancy在雪地等待。問到Nancy於MV中哪一幕最深刻？她笑說:「有一幕我同男主角，去到一個海邊雪地好溫馨咁散步，點知拍攝當日天氣好差，狂風暴雪，吹到個頭亂晒，最後我記憶呢一幕係喺一片混亂下咁完成，但估唔到呢一幕，會係成個MV入面，我覺得最好睇、最有感覺嘅一幕。」
Nancy更笑說遭同事整蠱：「MV入面有一幕，我係要仆親，我同事話呢一幕，我哋一take過啦，我就做啦，嗰一次我覺得我仆得好靚㗎，點知因為我太心急，佢哋未roll機，結果我要再嚟過，之後又因為各種拍攝原因又要重複咁拍呢一幕，天氣又大風又凍，我真係『仆』到呆哂，返到酒店發現，我兩個膝頭都仆到紅晒，好彩出到嚟效果都幾好，冇白費我仆咗差唔多20幾次嘅心血！」
將於2月15日生日的Nancy，今年生日撞正要開工，甚少慶祝生日的她，卻坦言很期待，「近年我都好少特別慶祝生日，都係同屋企人食餐飯、行吓街就當慶祝咗㗎喇，對我黎講，生日最緊要食到好食嘅生日蛋糕，但今年撞正同華納歌手做演唱會好緊張！我又未試過同咁多人一齊過生日，所以我都好期待！」
