Twins相隔9年再於紅館舉行《TWINS SPIRIT SINCE 2001 LIVE IN HONG KONG》，今日（5日）大會宣布加開終極第13及14場，日期為 2月5及6日，門票將於1月12日公開發售！
Twins今次第三度加場，兩人異口同聲說：「嘩！今次真係破晒紀錄！14場！做完真係可以好似歌迷傳言咁光榮引退啦！」工作人員叫兩人不要講笑，阿Sa笑說：「咁佢哋真係私信問我哋，係咪想解散嘛，笑死，我哋依家加第13，14場，1314一生一世啊！Twins就算退休都唔會解散，我哋係一生一世嘅好隊友。」阿嬌說：「係囉，1314，我哋都係一生一世！公司話係雙喜終極加場啦，歌迷應該最開心，因為我同阿Sa為大家爭取到，九成飛放出街賣！今次應該唔會再收到留言話買唔到，求票等等啦？大家千萬咪去炒黃牛，等買加場啦，我又可以有飛補少少朋友債啦。」
為演唱會排練及keep fit的阿嬌，表示今次好醒，「我已經學好晒啦（舞步），個人又瘦番。各方面都進行得好好，所以對演唱會好有信心，大家一齊期待啦。」阿Sa就表示由第一次開紅館到今時今日，每一次都當作最後一次演唱會，不過今次就有一個仍未解決的問題，她說：「咁多年來我哋演唱會都有握手位，今次我哋都好想有，因為好耐冇見歌迷，但係公司就出現好多反對聲音囉，佢哋好擔心我哋今次做14場咁多，驚我哋唔好好保護自己，近距離接觸咁多人會容易病，我同阿嬌依家都諗緊，點樣可以有一個握到手又安全的方式去解決呢個問題，等歌迷又開心，我哋又開心。」