梁詠琪Gigi與老公Sergio自結婚後，每年都會帶同女兒Sofia返西班牙探望老爺奶奶，讓老人家與孫女見面，Sofia日漸成長，令Gigi有感而發，希望Sofia與嫲嫲爺爺多些相處時光。
今次西班牙之行，Gigi更自掏腰包請埋經理人的兒子同行，Gigi與經理人合作二十多年，看住對方拍拖結婚生仔，感情早已如同家人，當年的手抱嬰兒轉眼已經18歲，Gigi坦言時光飛逝。
每年都會一家三口返西班牙的梁詠琪Gigi，趁女兒Sofia放暑假，在當地足足逗留了半個月，Gigi說︰「因為一年先見一次，想Sofia多啲接觸老公的出生地，而且想佢同爺爺嫲嫲培養多啲感情，所以趁暑假去耐少少，今次去西班牙除咗返去Sergio嘅home town外，仲去咗Madrid和Valencia，都係我第一次去，係西班牙東邊靠海嘅城市，暑假夏天嘅時候，好多本地人都會去嗰度放假；而今次同行，我仲帶埋經理人個18歲仔，因為睇住佢出世，睇住佢長大，我覺得18歲可以開始獨立啲，所以就俾佢自己搭一次長途機join我哋，加入西班牙其中十幾日嘅行程，梗係好開心啦，本來一家三口玩變咗四口，我都當咗佢係自己個仔咁，覺得係個好難得嘅經驗，將來佢都會記得自己18歲嗰陣同過Auntie Gigi去旅行，有一個難忘嘅18歲。」Gigi看着經理人兒子由手抱嬰兒長大成人，她坦言︰「光景飛逝，當年的手抱嬰兒而家同Auntie Gigi可以飲cocktail喇！」
除了西班牙，Gigi亦帶了Sofia去倫敦，因為女兒喜歡歌舞，此行主要是看音樂劇，「倫敦玩咗大概一個星期，主要係欣賞一啲限時演出音樂劇和藝術展覽，我哋睇咗個關於Michael Jackson嘅音樂劇，Sofia睇完即刻學moonwalk(Michael Jackson招牌舞步)，又搵返Michael Jackson嘅歌聽，唔覺唔覺Sofia都9歲喇，要俾佢開發多啲眼界，見識多啲呢個世界嘅新事物。」
Sidetrack show與歌迷「超近距離」
Gigi上月在台北舉行兩場「專屬的特別」sidetrack音樂會，同時亦為香港歌迷爭取11月搬在港舉行，今次Gigi希望與歌迷「超近距離」，選擇了香港演藝學院香港賽馬會演藝劇院舉行，Gigi說︰「今次點解會揀呢個600人嘅場地呢？因為上次開《時間遇上了我們》演唱會嘅時候，覺得同觀眾距離太遠，甚至乎有一場我攞咗個望遠鏡上台，希望可以睇清楚每位觀眾嘅樣、佢哋嘅笑容，所以我先諗開sidetrack音樂會，希望一個近距離接觸，而今次揀APA呢個600人場地都係呢個原因，大家都可以好近距離見到我，其實我都出咗道廿幾年，就快三十年，好多歌迷都變咗好似friend咁，大家聚埋一齊，可以近距離啲傾吓偈、唱吓歌，今次我會唱啲上次紅館冇唱過嘅廣東歌，我諗有啲我都冇唱過live添！」
