處變不驚是孝活的強項，他不會赤腳跑落樓梯，宋瑪莉亞見他張口食風，說不出話來，一面敏感走向樓上：「係咪ＢＢ妺喺上面發生咗乜嘢呀？」
「唔係，阿嬸嬸餵緊佢食粥，佢哋冇事……你哋兩個梗係冇開手機，係……係阿蓋Auntie個師弟，响吉隆坡打返嚟，搵到我，話俾我哋知，佢猛掛住喊……」
「喊乜呀，係咪阿哎吔家姊出咗事？」
「係，唔係……」
「又係又唔係……你想講乜？」，瑪莉亞已用手機急撥……「我打去問……」
「唔好呀，就係阿Auntie叫佢師弟話我哋知乜嘢事，等我哋知咗先，叫我哋唔好擔心，但又好傷心，叫我哋唔使打電話去安慰佢……」
「哦，明啦，單結婚摸和，佢同阿拿督反咗枱？」
「兩個加埋百幾歲，貪玩咩，過幾日就行禮咯。」
「你哋個師弟話，本來等到今朝，於是仲有一線希望喎……」
「仲等個麻甩佬返轉頭咩，自己當下咗道氣，嫁咗先至有數講㗎嘛。」
「但個拿督今朝天濛光，就送咗入殮房咯……」「吓？」「吓？」輪到我同瑪莉亞二人同時張口食風。
「你衝落嚟第一句就應該講咗呢樣嘢先喇嘛。」
「我冇講咩，我俾你哋個師弟，佢講嘢一嚿嚿，喊多過講，好耐先至知佢想講乜……」
「我哋點可以冇聲冇氣呀，打去同你家姊講兩句味收線囉。」
「唔好呀，你哋嗰師弟……」
「佢唔係我哋個師弟呀，我哋兩個冇唱過大戲㗎……」
「唔怪得你家姊話噚晚會再吩咐我哋帶啲乜，點知一啲聲氣都冇……」
「都話等到阿拿督天濛光至斷氣咯，而家都未夠七點……」
「佢哋冇話阿拿督幾點鐘斷氣……」
「呢位哥哥，人都入得殮房，唔通個人仲未斷氣咩？」
「唔係咧……唉，俾我返上去洗過塊面先……」有規有矩的孝活，看來不適宜做戰地記者。
「我哋唔好喺ＢＢ面前講呢件事，佢其實好明我哋平時講緊乜㗎啦，我驚佢呱呱嘈咋。」
「佢都唔知幾醒目，唔係婆波出咗事，就得㗎啦。聖旨好快就到㗎咯。」
哎吔家姊，如常比我們幾個人都冷靜，反正都冇婚禮，不如提早飛去送殯，但聖母皇太后，日落前已在手機氣定神閒傳來十大指引，巨細無遺。
「我喊到十二點幾都瞌咗一陣，但又嘈醒我話，行禮嗰日，酒店日頭露天嗰五百個位，晚黑嗰次又成千幾個位，取消唔見嗰筆唔緊要，但個個都買晒機票呢幾日到，啲政府官府仲當正嗰日公眾假期咁，我Kor Loud Yeah即係可怒也呀，阿Honey，即係阿拿督呀，咁錫我咁細心，早幾日要我一早起身唔使扮靚，捉我二人世界去靜靜雞做咗註冊，話咁先有個唔係嘈喧巴閉嘅回憶喎，你話佢幾sweet呢……嗱，俾我咳幾聲，我唔係喊呀吓……仲唔止，一早佢個醫生佢個律師，擒擒青話我知，阿Honey催我嫁俾佢，係驚自已預感個心瓣個症會翻發，又驚自己要盡快改定啲遺囑俾一大份我，你哋話，邊有咁大個人，用晒啲臨尾嘅日子喺我身上，成日叫我唔好瞓覺，我而家先至明，佢係想見得我一日得一日……總之我下晝會搞掂晒，原本結婚嗰日就愛嚟出殯，下晝晚黑嚟飲喜酒班人，變咗飲大型解穢酒，我又咳啦……夜啲我再講你哋四個嗰瓣，乜都照舊，頂多帶多件黑衫嚟替換……」