歌唱真人騷《中年好聲音2》周日除夕夜（31日）播出的「故事之歌」繼續淚水泛濫，以All Black造型亮相的陳俞霏獻唱《沒結果》，她坦言這首歌是她人生的寫照，她哭着說：「好細個爸爸就過咗身，媽咪一個人獨力湊大我，好多單親家庭嘅孩子都會明白，佢哋（父母）唔係好識愛，但佢會俾到好多物質上嘅嘢我，同埋選擇咗道路俾我行，其實講到底我都係想你接我返一次學，只係想一家人一齊食一餐飯，我咁多年嚟冇同屋企人過個一次生日，好多嘢都係批評之下度過，無論點做都冇用，所以我覺得人生係好失敗。」
人生閱歷豐富的肥媽聞言後語重心長說：「你覺得冇同屋企人食過一餐生日飯係好慘嘅事，你係錯嘅，你家人錫唔錫你佢永遠都係家人，同埋我哋嗰代讀得幾多書啫，其實你哋依家大個咗，應該知道我哋嗰代做嘢都好辛苦，我哋係用把口嚟教，我六年班都未畢業，點教我啲小朋友，咪日日鬧囉，但係出嚟都OK，我哋唔識教呀，唔代表我哋唔愛你，你知唔知呀？」
來自馬來西亞的沈宗賢獻唱《曲終人散》，他坦言上一段戀情對他傷害很深，「佢係我好喜歡嘅一個女仔，佢為咗我同屋企人嘈交甚至反面，我當時係以唱歌維生，收入唔穩定，依家諗番起係辜負佢好多，分手嗰刻係好絕望，佢要出埠做嘢，但我嗰時仲喺度考慮，唔想放棄音樂，到我掙扎咗成年之後，有一日夜晚，佢同我講不如分開啦，當時我已經辭咗職放棄唱歌，但佢話已經太遲，叫我唔使放棄、繼續追尋我嘅夢想。」感性的宗賢獻唱前先來一個獨白：「可能這輩子我們注定只可做朋友，是我沒用，去找你的幸福吧。」唱到尾聲更忍不住爆喊。婉婉踢爆宗賢分手後未有再拍拖，伍仲衡笑指對方「戇居」，張佳添更笑言：「我真係無言，成個森林喺出面，我單身咗8年，但我永不孤單！」場面搞笑。
