方力申獨自飛過兩次44歲生日　多哈參加泳賽自爆肥但狀態好

方力申（Alex）今日（26日）44歲生日，昨晚（25日）他在上交網上載獨自登機到多哈參加「世界先進游泳錦標賽」，留言：「今次真係大個仔，除咗自己一個人飛之外，我仲會過兩次生日添，一年過兩次226。 第一次在空中，第二次落機之後，應該仲係225。」

 

踏入凌晨時分，剛好在飛機上度過44歲生日，拍片紀錄的他留言：「大住一歲先，啱啱喺飛機上面過咗12點，2月26號喇！」到達多哈後，Alex又再慶祝多一次：「咁樣就大咗兩歲，你話個樣唔殘都幾難，快啲瞓覺喇，但我又唔敢瞓太多，怕聽晚瞓唔着，影響第日嘅比賽就大鑊。多謝大家陪我一條友過生日，多謝大家嘅祝福，收到晒﹗」他在片段中透露明日是他主項200背泳，狀態一定比去年在福岡時好，但隨即補充：「除咗係肥咗之外，冇辦法啦，新年吖嘛，跟住又生日吖嘛，大把Friend同我慶祝啊！」片尾還介紹下榻的酒店及房間。