陳山聰於TVB《萬千星輝頒獎典禮2022》當晚奪得「最佳衣着藝人獎」，一直愛打扮買潮物的他，終於後繼有人，囝囝Jaco遺傳了他的愛靚性格，會在舖頭揀衫仔褲仔，最搞笑是他會將衫併在身上，好似大人咁。陳山聰說平時除了幫自己扮靚外，都會幫囝囝Jaco打扮下，適逢農曆新年，當然要幫Jaco襯一襯衫，「首先梗係恤返個靚髮，其實平時比新年更加花心思去打扮，因為新年主要以紅色或金色為主，以喜慶感覺比較簡單。」陳山聰今次更襯了父子裝過年。他表示囝囝每個月的置裝費沒有想像中高，「其實很少數目，你估小朋友嘅衫好貴咩？一般都好平，只係平時我們配搭得好，令大家覺得好似好多造型，現在小朋友的衣服好大眾化，很多地方或上網都可以買得到，而且唔貴，現在我好少買衫俾自己，多數買俾囝囝，因為買俾佢，真係平好多好多倍，而且又不需要品牌，加上有時候又會有贊助，所以花費唔多。」至於每年新年習俗？「跟普通家庭一樣，會買碌柚葉沖涼，同埋抹屋企，洗地，之後再換新牀單、睡衣及毛巾，全部太太都會打點晒，最開心當然是年初一，囝囝向我們拜年，去年Jaco開始識主動講說話及表達，聽佢講恭喜發財就更加開心，每一句祝福的說話都會記在心。」
