35歲江若琳（Elanne）與蕭唯展（Oscar）結婚4周年，一直都表示想生B的二人，終於宣布造人成功，於社交網貼上在聖誕樹前，拿着BB衫的興奮合照，及分享胎兒超聲波，坦言是「最珍貴的禮物」。
Elanne表達了這4年間的心路歷程，留言：「今日係我哋兩口子結婚4周年啦，今年我哋得到咗一份渴望好耐而又彌足珍貴嘅聖誕同結婚周年禮物。我倆等待你嘅出現足足4年啦，一直都以為生BB係一件理所當然，好容易嘅事，但呢幾年間經歷過不停嘅嘗試又不停咁失敗，連身邊嘅朋友都比我哋着急，次次都關心我哋幾時生得出。我哋都會感慨，生仔原來好難，但到最後我們已經選擇咗半放棄，經常都話，就算世界只係得我哋兩個，我哋都會快樂地走到白頭，不過人生就係一個充滿驚喜嘅旅程，每當你好用力想要得到一樣嘢嘅時候，往往總係事與願違，但當你選擇放下放輕鬆時，聖誕老人就會喺一個最美好嘅時間點，將你最想要嘅禮物送俾你！」
Elanne開心續謂：「4年前，我得到咗一個好愛我嘅生煎包；4年後，我哋得到咗一個最愛嘅BB包。BB包，感謝你嘅到來，時間不遲也不早，來得剛剛好！雖然我仲未想像到我做人阿媽係點，應該都係論論盡盡，騎騎呢呢咁，但我哋會努力學習，將最好嘅俾你！」她又道出妊娠反應：「呢幾個月失蹤咗的我，喺疲累、反胃、嘔吐嘅生活中不停徘徊，但每日都充滿住感恩同感動。請繼續折磨我吧！你繼續健康平安長大就好」。
快將當爸的Oscar，感言也不輸老婆，他留言：「結婚4周年了，身體健康夫妻和睦冇乜鬧交，多謝老婆。依家我嘅心情就好似美斯攞咗世界盃咁，我哋四年前嘅今日結婚，我望住好多小朋友喺我嘅婚禮入面跑來跑去，好可愛，好希望快啲有一個我哋嘅BB。點知……努力咗四年，中間試過好多次失望，醫生話雖然我靚仔，但精子唔合格，好難有BB。但係我習慣咗只要有夢想，凡事可成真嘅理念。首先檢討一下自己，重新建立一個健康嘅自己，戒咗煙，不停跑步做運動，食健康啲。終於四年後嘅今日，我哋成功攞到世界盃喇。多謝老婆，多謝每一位提供過良方俾我哋既朋友」。
