泳兒宣傳新歌快閃派利市　笑指：全部都係貪錢鬼

泳兒當街派錢好奮。

泳兒（Vincy）為宣傳新歌《撞到正》，她跟網上平台即興到旺角跟網民大玩尋寶遊戲，Vincy去到遊戲地點後，即在其IG公布「尋寶」的時間及地點等消息，當「有緣人」見到Vincy，只要說出「暗號」：「我撞到正泳兒，你真係好鬼正。」便可以得到一封$100利市。

當見到泳兒及說出暗號就有$100利市。

尋寶遊戲共3場，早前已於旺角進行第一場，短短半小時，Vincy手中30封利市便一派而空，反應熱烈。Vincy笑說完全感受到大家非常現實：「全部都係為咗錢過嚟，我首歌係講人比鬼更可怕，原來係真嘅，全部都係貪錢鬼，哈哈。本身諗住宣傳隻歌，但係大家一嚟到，我問佢哋搵邊個，佢哋就話：『搵錢。』笑死我。不過最緊要大家開心，攞完錢之餘都碌吓我隻新歌《撞到正》。」

泳兒話最緊要大家開心。

接下來的第二及第三場分別於星期五（22日）及星期日（24日）進行，Vincy坦言因為金額將會提升，所以她要堅守遊戲規則，一定要說對暗號才派發獎金，「我唔可以咁心軟，同埋難度會提升，自己都諗吓有啲乜嘢難題去問大家，因為聽聞呢個平台平時啲遊戲係好難玩，所以我要提醒大家如果要拎錢嘅話，就要留心睇吓我哋嘅遊戲規則啦。」

預告餘下兩場會加碼。