炎明熹黑膠碟全城斷貨 粉絲開價九千求轉讓

炎明熹（Gigi）剛完成3場個唱，上周六（20日）即出席由粉絲後援會於她的生日月進行的捐血及義賣日活動，收益扣除成本全數捐贈APF愛培自閉症基金。當日除了部份義賣精品一早被歌迷搶購一空，亦有近一百位歌迷報名捐血，獲贈印有卡通版Gigi的「Gi囡鎖匙扣」；身為偶像的Gigi亦打算以身作則捐血救人，但可惜去到捐血現場，閱讀捐血守則時，才發現服用過中藥不能捐血，Gigi即時扁嘴，還用「好失敗」來形容自己，表現得非常失望。

提到活動前一晚，與歌迷在社交網開Live，分享演唱會點滴，Gigi坦言尾場完show一刻，激動得不斷落淚，內心非常不捨，這段時間腦海仍不時浮現演唱會的畫面。她說：「不過當晚都有開心嘅時刻，因為終於可以飲汽水，到第二日，因為爸爸媽媽同細妹要走，陪完佢哋飲茶送佢哋離開，我就返屋企執屋，之後打邊爐，因為做show，我會避免食濃味同刺激嘅食物。另外，嗰晚有歌迷提議我搞busking，以前十三、四歲都試過兩次喺尖沙咀碼頭busking，嗰陣心情好緊張，因為未試過咁多人圍住聽我唱歌，依家都好想再試吓去海旁busking嘅感覺，希望大家可以嚟支持，不過未知幾時會搞。」

提到演唱會跳唱環節外界一致讚好，Gigi也收到了大家的意見，並預告正籌備一首跳唱歌，滿足樂迷的同時，也是對自己的一個挑戰。「已經揀咗歌，但未開始錄音，因為仲研究緊點樣可以再做好啲，首歌你會幻想到有一個人、戴住頂帽喺度噠手指好有型，希望首歌可以做到我哋想要嘅效果，或者俾大家見到另一種風格嘅Gigi。」

上周六同是Gigi人生第一隻實體唱片推出的大日子。為響應香港唱片店日，Gigi的第一首派台歌《真話的清高》，被印製成7寸黑膠唱片發售，由於是限量發行，多區的唱片店外出現通宵排隊等唱片店開門的人龍，捐血日當天便有歌迷說自己「排第三個都買唔到」，甚至有歌迷在買賣網站出價九千元，求好心人割愛轉讓唱片給他。「我知道外間銷情都好緊張，有歌迷凌晨四點已經開始排隊，知道呢個消息感動到起雞皮，好多謝大家嘅支持，自己都唔知有冇辦法可以留到隻碟送俾屋企人，如果真係冇晒貨，我會將我自己手上呢隻碟，送俾佢哋。」

不單只買碟支持，後援會更於港、九兩大旺區，買下LED廣告屏幕，播放Gigi的全新主打歌《還有一艘救生艙》，地點分別是銅鑼灣港鐵站F1出口，以及尖沙咀加拿分道及金馬倫道交界大廈外牆，Gigi出席完捐血活動後，親自去到尖沙咀拍照打卡，感謝粉絲對她的支持。