風車草黑心喜劇《Di-Dar音樂劇場》，昨晚（9日）假香港演藝學院公演尾場，梁祖堯、湯駿業、邵美君、葛民輝、岑珈其、何洛瑤、梁浩邦、阮韻珊、鄧家杰、杜曦駿在謝幕時，情緒高漲，更安哥劇中的歌舞場面，再次炒熱氣氛。
阿祖特別感謝阿葛，「以前聽軟硬天師嘅時候，點會諗到第時有一日會同佢同台！永遠感激你，喺呢個旅程入面畀我哋嘅所有嘢。」阿葛即回應：「其實我係後輩，呢啲先係前輩。其實我要感謝風車草，因為佢哋搵咗好多新演員，好多未掂過台板，我都只係第二次踩台板，嚴格嚟講我都係後輩嘅一部分。阿祖搵咗我之後，真係大開眼界，今晚呢場係黐線㗎！令我感受到風車草嘅劇迷，原來係咁黐線㗎！」
阿葛最難忘劇中瞓棺材一幕，因為正值農曆七月，笑言幸好平生不作虧心事，所以無有怕。在劇中扮演鬼魂的珈其，亦表示未驚過，「我哋入場有做足拜四角，人人都有護身符，我嗰道符仲要係加料勁啲嘅，所以就算七月十四嗰晚要演出都唔驚！而且投入演出，要記住台詞、歌詞、舞步，都無理咁多喇！」湯駿業透露與團隊正考慮重演，「因為好多觀眾都未睇，淨係waiting list都可以開多兩星期，所以真係好希望有機會演多次，等多啲觀眾可以入場一齊笑、一齊感動。」
更多現場圖輯：
