蔡思貝主持的旅遊節目《貝遊歐洲》今晚去到意大利的維羅納展開浪漫之旅，維羅納被喻為「愛的城市」，莎士比亞名作《羅密歐與茱麗葉》便以當地作背景。
思貝去到「茱麗葉屋企」參觀，該處設有茱麗葉銅像，不少遊客排隊摸其右胸，思貝解釋謂：「相傳如果摸到佢右邊胸部，就會為你嘅人生同愛情帶嚟好運，仲會搵到真愛。」思貝最後幾經辛苦摸到銅像，並拍照留念。除了「真愛」銅像，茱麗葉家中還有個「愛情洞」，洞內收藏了來自世界各地遊客的情書，思貝看完其中一封情書後，更大嘆「愛情應該係轟轟烈烈」！
是集另一焦點，是思貝相約相識多年的好友徐肇平（Shao）在維羅納相聚，高大靚仔的Shao插晒褲袋型格登場，豈料思貝卻難頂謂：「你唔好Chok啦，行啦！」其實思貝是次主要目的是跟着shao去「拜師學藝」，事緣向來醉心鑽研廚藝的Shao，飛到此地也是專誠向當地家庭主婦學煮地道意大利菜，思貝只是「搭單」學埋一份。二人在當地家庭主婦悉心指導下、炮製了新鮮handmade意粉和杏仁金寶，期間思貝大爆Shao笑料：「呢個人出過cookbook，佢其中一味餸俾我哋笑足十年，係教人點整鮮果串，即係將啲生果切咗一粒粒再用竹籤串住，呢個係食譜喎？」
之後二人去到海拔774米高的聖母卡羅納聖殿參觀，並再爆Shao趣事：「點解我哋咁friend？有一次同期入行嘅一大班朋友食飯，食完飯傾偈嘅時候，佢突然放咗個好響嘅屁，仲要對住我！」被爆料的Shao則抵死回應：「咁咪勁囉。」場面搞笑。
