就Eric事前身體狀况，Angie說：「佢身體一直都好好，朝早一齊做運動，我哋成日食生果，注重健康，本來打算Join gym，想身體健康影輯好靚婚紗相，奈何有唔開心事發生，但我哋都會一直keep住Eric好好嘅spirit，一直生活落去。（未影婚紗相？）未影，所以諗住健身食健康嘅嘢，早睡早起，呢個係我哋本身習慣，我哋不嬲都有做嘅，但係結婚要更加謹慎。」
Angie又透露Eric出事前幾天的身體狀態：「其實佢又冇乜，係有啲攰，佢好清醒，同平時一模一樣，冇乜特別，我哋有講有笑照睇電視。」Fiona在旁補充：「佢好健康嘅，所以大家唔好揣測太多。」
有指Eric急性肚痾？Angie說：「其實佢有肚痾，唔係急性，係斷斷續續，唔係去得好多次，但都有肚痾。（除肚痾有沒有其不適？）有少少腳抽筋，食完蕉就冇事，屋企長期有蕉。」問到Eric父母狀况？Fiona說：「佢哋OK，Angie及Eric中學好友陪佢哋食飯，好想將Eric好樂天、樂觀及大細路性格，繼續傳承落去，父母都OK，我哋會睇住，Angie變成我哋家人，大家可以放心。」
Angie在社交平台貼出多張和Eric的照片，她說：「呢兩年好開心，Eric帶俾我好多歡樂，佢係好正能量嘅人，好希望將佢呢個Spirit延續下去。」
談到有關Eric的喪禮，Fiona說：「噚日跟Eric好友傾咗一輪，佢唔鍾意傳統嘅嘢，古靈精怪，會同佢安排別緻送別會，希望大家唔好帶住憂傷，要記住佢嘅樂觀同大孩子性格，我哋再有安排會通知大家。佢係基督教徒，嗰日都請咗院牧祈禱及唱聖詩。」追思會要等農曆年之後安排。
至於Eric可有心願未了？Angie說：「佢好想同Fiona出本書，都寫到差唔多，我哋會同佢完成件事。」Fiona亦說：「幾個月前佢聯絡我，因為我係畫畫，佢用文字出一本書，我哋做咗出嚟大家都會知道，我、Angie及中學同學幫佢達成心願，我哋覺得佢56年人生好圓滿、無悔，帶好多快樂俾大家，佢由細到大都好樂觀。」
