早前熱播劇《婚後事》四位主角陳自瑤（YoYo）、賴慰玲（Winki）、黎諾懿及羅天宇主持的全新綜藝節目《香港婚後事》，將於今晚（25日）首播，首集嘉賓是劇集男主角羅子溢。
黎諾懿一來即單刀直入，叫子溢解構姊弟戀背後因由，子溢亦大方分享：「當時我覺得需要一個成熟嘅女人喺身邊，可以令自己成長得快啲，同埋搵到安全感。」直認偶爾會與太太楊茜堯冷戰的子溢，還分享了二人處理爭拗的手法，子溢的方法是「第一時間讓步」，「我以前會拗，依家屋企所有濕碎嘢我係唔會理，總之你決定就啱㗎喇。」至於太太的處理方法則是「瞓醒先算」，「我太太一遇到問題，會話唔好講住，等瞓醒先（處理）。」子溢在節目中又分享了相當獨特的湊女心得，並謂希望女兒長大後能成為硬淨的人。
五人討論得最熱熾的話題，則是「肉體出軌」VS「精神出軌」，Yoyo一聽到諾懿題目，即斬釘截鐵謂：「兩樣都唔得！」諾懿即反駁：「諗吓咋喎。」Yoyo聞言即一臉認真向諾懿拋出兩條相當尖銳的情境題，分別為「如果你老婆同你一齊，佢不停諗緊第二個男人，你接唔接受到吖？」及「如果你老婆出完軌一次返番嚟你度，你接唔接受到？」即成功令諾懿陷入苦思，並坦言確有一個狀況難以接受。之後Yoyo再追住諾懿問：「如果佢鍾意咗另一個，佢之後返番嚟屋企，但個心都係飄走咗，咁又得唔得？」
除了talk得，子溢還相當玩得，他的出招對象當然是最怕醜又內向的天宇。事緣子溢一到場即追問天宇緋聞，嚇到天宇即時眼都凸埋，Yoyo在旁食晒花生笑謂：「你好大膽。」諾懿則佻皮謂：「嘉賓講嘢可以唔負責任呀。」之後全場起哄笑個不停，五人進行了長達數分鐘的「廝片」，天宇全程「怕醜草」上身面都紅晒，場面爆笑。除了天宇，Yoyo及諾懿亦是被玩對象，前者不斷遭子溢苦勸：「過去咗喇，唔好再執著個角色喇。」後者則不停遭阿賴搞笑攻擊，「全公司都知你最有錢。」阿賴錄到一半，更揚言要先行離開大隊回家找老公。
