馮允謙（Jay Fung）早前完成紅館演唱會稍作休息後，隨即與二百多位「追風」（Jay Fung歌迷暱稱）舉行大型歌迷聚會，這更是Jay Fung入行十一年首辦歌迷聚會。
Jay Fung與一班歌迷聚餐兼大玩多個遊戲，他表示：「我今日係非常開心，可以同歌迷一齊食嘢、一齊玩，係一個好好嘅回憶，我要多謝會長，幫手安排聚會嘅rundown，令成個活動好順利完成。」
去年七月Jay Fung在九展舉行首個演唱會時，全場歌迷高舉印有「下次紅館見」的手幅，事隔八個月，Jay Fung圓夢踏上紅館，他坦言非常感激歌迷的支持：「每個歌迷都好錫我、俾我好多包容、好照顧我，我覺得自己係一個好幸福嘅藝人，冇佢哋嘅支持，我唔會有今日。當晚嘅聚會，我見到好多新面孔，亦都有我出道支持到依家嘅歌迷，有部分平日只會喺我嘅FB或者IG留言，但呢晚都專登出嚟聚會，我真係好開心。所以我喺台上有應承班歌迷，會繼續作多啲好歌，用嚟報答佢哋！」
Jay Fung在聚會上化身「新郎哥」以橙汁代酒，走勻全場逐枱敬酒，還有跟現場歌迷逐一單獨合照，最後當然少不了全場一起大合唱，他說：「我哋有一齊jam歌，雖然只係唱咗一少段《報復式浪漫》，但我啲歌迷真係唱得好好聽，下次聚會，可以一齊唱卡拉OK。」
