為影靚相呃Like，你可以去到幾盡？無綫小花陳瀅（Jeannie ）同劉佩玥（Moon）最近就帶埋好多靚衫飛去冰天雪地嘅俄羅斯拍《3日2夜》，仲勇到喺雪地上面着低胸裝露「事業線」影相，呢張靚相成功呃到網民二萬幾個Like，真係愛靚唔愛命嘅最佳示範！
睇番啲相十居其九都係白茫茫一片，就算冇親身去到現場都感受到當地有幾凍。阿Moon都留言話喺呢度飲可樂絕對唔使落冰，因為將罐可樂直接擺喺雪入面一陣就直接飲得，而佢哋兩個好似無視咗雪地嘅低溫，照樣整頭化妝，着住套性感洋裝，喺雪地上面展露好享受嘅笑容，唯美靚相影完一張又一張，仲好識做咁擺上網同各位粉絲分享。睇完呢幾張靚相，筆者不得不向每位愛靚唔愛命嘅女士寫個服字，因為佢哋有得靚就完全唔會怕凍！
兩位女神當年拍攝無綫劇集《四個女仔三個Bar》因而認識，私底下感情相當要好。今次拍《3日2夜》日對夜對，仲升埋Level做「瀅蜜玥」，可見姊妹情確實增進唔少，阿Moon亦喺社交網留言分享拍攝感受：「一些屬於我們的小事：) 不用加冰的可樂，第一天看的日落，沒眼耳口鼻的俄國娃娃，她為我煮的羅宋湯，和雪橇狗狗共渡（度）的一天，老婆和夕陽，好靚但用不著（着）買的手信，安朵拉喜歡的貓，我們的安樂蝸，每次下車也看見的雪。感恩！」「風雪同路。感謝妳在我的生命裏陪我吵、陪我鬧、陪我哭、陪我笑，手牽手的繼續向前行，融化淚，分享美，緊握夢，抱著愛。」
