金像影帝丹素華盛頓(Denzel Washington)繼2014年的《叛諜裁判》(The Equalizer)，再次在續集飾演暴力判官。電影日前於北美率先開畫，對比同期一大批合家歡電影，含大量暴力的《叛諜裁判2》(The Equalizer 2)原本被睇低一線，但最後竟爆冷以3582萬美元(約2.79億港元)勇奪美國首周末票房冠軍。唔講唔知，今次仲係丹素華盛頓入行以嚟，首次接拍續集，第一次就有咁好成績，證明佢眼光獨到！
《叛諜裁判》改編自美國經典同名犯罪劇集，丹素華盛頓飾演美國前突擊隊成員麥戈，對犯罪集團恨之入骨，用暴力制裁罪犯，上集佢單人匹馬殺入重圍，一手瓦解賣淫集團，手起刀落痛快淋漓。《判諜裁判2》由上集導演安東尼奎克(Antoine Fuqua)繼續操刀，講述麥戈原本打算隱姓埋名，做兼職司機過平凡生活，誰知好友忽然死於非命，鄰居亦受牽連，他誓要揪出幕後主使的兇手，為無辜的犠牲者報仇，麥戈秉持一貫以暴制暴的作風，為對付更龐大的犯罪組織，不惜大開殺戒。
雖然上集電影全球大收1.92億美元(約14億港元)票房，不過續集撞正暑假檔期一眾合家歡電影，《判諜裁判2》原本被睇低一線，結果出乎意料，電影輕取票房冠軍，大有可能破埋首集的票房紀錄。難怪丹素華盛頓入行41年嚟，第一次首肯拍電影續集，相信佢一早睇好《判諜裁判2》的故事發展，今次的票房都證明佢好有眼光！唔知，《判諜裁判2》9月13日喺香港上映之時，可否延續氣勢，再次贏得開畫冠軍？
圖片來源：互聯網