麥浚龍與謝安琪於上月聯手推出的專輯《the album and the end of it》，隨碟附上的QR Code更暗藏彩蛋，衍生另一故事，由原本只是講述董折浦銘心糾纏數十年的愛情故事，變成跨越幾千年的科幻故事，這個構想原來早在2019年Kay的演唱會中最後一幕，歌曲《773312》MV中化身成為機械人時已透露玄機。
Juno化身成為電腦管理員與超級大電腦的有趣對話，談及人類與科技之間的分別，他說：「電腦解決問題時可以透過好多資訊解答到好多問題得出好多億個答案，例如佢可以解讀何謂愛，但佢解讀唔到心嘅改變。人類同動物獨有嘅情感，電腦係解讀唔到。電腦看似萬能，但感受唔到味道、質感，佢即使識得模仿歡樂悲傷，但因為冇經歷所以同人類之間有情感嘅區分，不過亦有好多事情人類做唔到，電腦先做到，呢條短片係想講兩者之間嘅矛盾，所以已經超越咗純粹講故事。」
Juno過去十年在創作上從無間斷，「由電影《殭屍》到專輯《Addendum》到電影《風林火山》再回到專輯《evil is a point of view》同埋《the album》系列，再加上藝人管理工作，呢10年創模式好豐富但冇停過，感覺好疲勞，加上之前拍攝電影整親條腰而積落嘅舊患，令到我想喺新一年改變創作方式，所以新一年，最希望身體健康同埋快樂，同時亦祈願大家繼續為美麗而生。」
