張天穎（Jaime）今日（14日）推出最新歌曲《Pick Up Your Phone》，除了擔任作曲、編曲及監製，今次更邀請了麗英@小薯茄為新歌featuring、鍾說填詞，還請來楊振邦共同監製新歌，她說：「填詞搵咗鍾說填，因為想學多啲嘢同有進步，所以請咗好有經驗嘅楊振邦同我共同監製首歌！之前有睇小薯茄，覺得麗英係一個好搞笑、好可愛嘅人，上年出第二首歌嘅時候，其實係諗住出《Pick Up Your Phone》先，不過，錄完、編完同埋mix完後，一直都覺得爭咁啲嘢，直到聽歌聽到麗英嘅《FreeRider》，覺得佢好啱唱呢首歌，所以就膽粗粗去問佢，問佢想唔想試吓一齊玩。」
至於新歌內容，Jaime說：「首歌係講關於一種迷惘，好似你約咗一個人，最尾佢冇出現，同時見到佢哋喺IG度post咗同其他人出街嘅story，令自己諗自己喺人哋心目中嘅價值係咪原來好低，同時間又會有少少嬲，點解佢唔誠實啲咁講真話。」Jaime與麗英齊齊為新歌拍攝MV，她笑言拍攝當日發生的所有事都是趣事：「由我哋着住Y2K顏色、好鮮艷嘅衫遊走香港每個角落，好多人都用奇異嘅眼光望住我哋兩個！係有少少尷尬，不過，同麗英一齊好開心、好enjoy！就好似活咗喺自己嘅世界入面！」
MV背景是回到2005年，所以造型師特別找來鮮明亮麗的candy colour小忌廉裙，來配合當年盛行的Y2K風格，Jaime說：「特登搵咗有小忌廉嘅顏色嘅服裝，超級靚！第二套衫係黑白色，同麗英嗰套好似，係想講喺未來嘅世界或者AI機械人嘅世界內，每個人嘅服裝會愈來愈似。」
