許靖韻（Angela）新歌MV《被吃掉的靈魂》昨晚（17日）上架，今次新歌歌名跟她17年的作品《被討厭的勇氣》十分相似，歌詞同樣出自林若寧手筆，不過展現出兩種完全相反的心境。
Angela表示錄歌時，跟歌曲監製徐浩都覺得林若寧好像有意無意地將新歌跟《被討厭的勇氣》有種關連，但其實是沒有關連，「我哋有嘗試去理解，因為當時《被討厭的勇氣》喺我出道第四、五年，一個成長階段，佢俾咗呢一首歌我，非常之正面去鼓勵我；去到今年，佢就俾咗呢一首超級負面嘅歌我，究竟點解呢？可能有時覺得我應該開始可以handle到啲負面情緒，但我覺得其實兩首歌係一個天、一個地，極大contrast，但我哋會覺得其實又有啲關連，因為好好活着都係一個最大勇氣！」
消化了歌詞後，Angela表示：「有時候我哋會將『攰到想死』掛喺嘴邊，但唔會真係俾自己死，我覺得有啲反映咗喺歌詞裏面。」雖然Angela一直予人開朗正面感覺，但總有沮喪時候，她形容自己是一個極端的人，情緒可以由零跳到一百，「平時可以好開心，但唔開心時，我係爆發式咁喊，試過喊足一日，頭痛到食止痛藥先瞓到覺。」Angela錄音時回想崩潰的經歷，將情緒注入Lesta Cheng創作的旋律，並配上徐浩和黃兆銘哀傷的編曲，將《被吃掉的靈魂》送給處於低谷中的你，「一個人失落嘅時候，好難去聽一啲輕快嘅歌，如果你處於絕望，希望呢首歌可以治癒到你。」
整個MV中，Angela坦言第一場戲，最令她印象深刻，「因為其實首歌係好emo，咁啱拍第一場海邊景，個天落毛毛雨，成件事好襯首歌。如果今朝我哋拍嘅第一場，係陽光普照或者係好好天，我就覺得同呢首歌夾唔到。」其實鏡頭前後，同樣有着極大對比，Angela說：「其實我嘅情緒應該要比較唔開心、心比較負能量，但因為我哋拍攝期間嘅環境，其實好歡樂，當時好多學生同埋有其他人喺側邊游緊水，好歡樂，所以我覺得同我形成咗一個好大contrast，我比較難忘同深刻都係今朝早第一場，喺海邊拍嘅呢一幕！」
