梁朝偉今早（19日）突襲商台接受林海峰（Jan）等主持的《在晴朗的一天出發》訪問，震撼整個商台。
多年前偉仔曾以歌手到商台受訪，今次則為宣傳新戲《金手指》，他在戲中角色，原型為「佳寧案主腦」陳松青。偉仔表示：「因為呢個人好神秘，變咗我唔係好知道點樣做，導演希望我唔好照抄，有自己創作，唔好照足真人咁樣做，原本個人有幽默感、好有魅力、好識交際。（減咗幽默感？）減晒，我又覺得係咪可以試下，一個人可以喺咁短時間裏面，突然間變成咁有錢、咁有影響力嘅人，係咪可以囂張啲、意氣風發啲，開頭設定佢係生意失敗工程師，嚟到香港遍地黃金，好多機會，咁後來機緣巧合，借殼上市炒股票；然後嗰個人嘅轉變，變到失控，覺得自己係神。」
再次與劉德華和莊文強導演合作，偉仔覺得有種Reunion感覺：「今次又係莊文強，佢特登咁樣整故仔引我去拍，如果我冇一個實質人物，我諗唔到係點拍，我就唔拍，佢整咗個藍本，重聚梗係一個誘因，同華仔合作30幾40年，莊文強拍《無間道》時，合作好愉快，除咗拍戲，平時都有交往，傾電影、傾書本。」
朝偉謙稱人愈大，變得愈來愈懶 ，「太多包袱，好驚一樣嘢做出嚟唔好呀。（《新紮師兄？》）享受當年演出，冇包袱，冇乜人對你有咩期望，反而自己鍾意點做都得。我同熟朋友，就會放啲。」朝偉大讚劉德華照顧人，並憶起拍《鹿鼎記》點滴，他說：「大家做好朋友，當年拍咗幾十集，有一段時間一齊，建立好特別關係、同埋建立好多信任，我相信個默契喺嗰時建立。」
